హనుమకొండలో భూ వివాదం.. రిటైర్డ్ ఎంఆర్ఓ వేధింపులపై బాధిత కుటుంబం ఆవేదన :

హనుమకొండ : తమ సొంత భూమిపై ఓ రిటైర్ ఎంఆర్ఓ కన్నేసారని.. అనవసర వివాదాలు సృష్టిస్తూ తమను తీవ్ర ఇబ్బందులకు గురి చేస్తున్నారని ఓ బాధిత కుటుంబం ఆవేదన వ్యక్తం చేసింది. గత నాలుగు దశాబ్దాలుగా అదే స్థలంలో నివాసం ఉంటూ పెంకుటిల్లు నిర్మించుకొని జీవనం కొనసాగిస్తున్నామని వారు తెలిపారు. ఆర్థిక ఇబ్బందులు కారణంగా ఇటీవల ఆ స్థలాన్ని మరో వ్యక్తికి విక్రయించామని.. అందుకు సంబంధించిన రిజిస్ట్రేషన్ పత్రాలు లింక్ డాక్యుమెంట్లు, బిల్డింగ్ అనుమతులు సహా అన్ని చట్టబద్ధ పత్రాలు తమ వద్ద ఉన్నాయని పేర్కొన్నారు.

అయినప్పటికీ రిటైర్డ్ ఎంఆర్ఓ వ్యక్తిగత కక్షతో తమపై ఒత్తిడి తీసుకొస్తున్నారని ఆరోపించారు. తమకు ఎలాంటి సంబంధం లేని డిపి నంబర్ ని సాకుగా చూపిస్తూ అనవసరంగా వివాదం సృష్టిస్తున్నారని.. దీనికి కొందరు అధికారులు సహకరించారని బాధితులు ఆరోపించారు.

తమకు ఎలాంటి సమాచారం ఇవ్వకుండా రిజిస్ట్రేషన్ దస్తావేజు రద్దు చేయడం తీవ్ర అన్యాయం అని వారు ఆగ్రహం వ్యక్తం చేశారు. ఈ విషయమై కాజీపేట సెక్షన్ 2 మునిసిపల్ కార్యాలయంలో ఫిర్యాదు చేసినట్లు బాధితులు తెలిపారు. ఫిర్యాదును స్వీకరించిన అధికారులు పూర్తిస్థాయిలో విచారణ చేపడతామని హామీ ఇచ్చినట్లు చెప్పారు. తమకి జరుగుతున్న అన్యాయంపై జిల్లా కలెక్టర్, మునిసిపల్ కమిషనర్ ప్రత్యేక దృష్టి సారించి సమగ్ర విచారణ జరిపించాలని బాధ్యత కుటుంబం విజ్ఞప్తి చేసింది. నిజాలు వెలికి తీసి తమకు న్యాయం చేయాలని ఉన్నత అధికారులను కోరింది.