మహబూబాబాద్ జిల్లాలో సైబర్ కేటుగాళ్లు మరోసారి రెచ్చిపోయారు. డిజిటల్ అరెస్ట్ పేరుతో భయభ్రాంతులకు గురిచేసి, ఒక రిటైర్డ్ ప్రభుత్వ ఉపాధ్యాయుడి నుంచి ఏకంగా రూ. 82,40,000 కాజేశారు.

మహబూబాబాద్‌లోని కంకరబోడ్ ప్రాంతానికి చెందిన రిటైర్డ్ ఉపాధ్యాయుడికి గుర్తుతెలియని వ్యక్తులు బాధితుడికి వాట్సాప్ వీడియో కాల్ చేశారు. తాము సీబీఐ (CBI) అధికారులమని నమ్మబలికారు.

​బెదిరింపులు: బాధితుడిపై వేధింపుల కేసులు ఉన్నాయని, అరెస్ట్ వారంట్ జారీ అయిందని భయపెట్టారు. కేసు నుంచి బయటపడాలంటే డబ్బులు చెల్లించాలని ఒత్తిడి తెచ్చారు.

​ నిందితుల మాటలు నమ్మిన బాధితుడు, వారు చెప్పిన వివిధ ఖాతాలకు విడతల వారీగా మొత్తం రూ. 82.40 లక్షలను బదిలీ చేశారు. ​తాను మోసపోయానని గ్రహించిన బాధితుడు లబోదిబోమంటూ పోలీసులను ఆశ్రయించారు.

​ గమనిక: సీబీఐ, ఈడీ లేదా పోలీస్ అధికారులు ఎప్పుడూ వాట్సాప్ వీడియో కాల్స్ ద్వారా అరెస్ట్ చేస్తామని బెదిరించరు. ఇలాంటి అనుమానాస్పద కాల్స్ వస్తే వెంటనే 1930 నంబర్‌కు ఫిర్యాదు చేయండి.