న్యూఢిల్లీ, ఫిబ్రవరి 12:
వరంగల్ సమీపంలోని మామునూరు విమానాశ్రయాన్ని అంతర్జాతీయ ప్రమాణాలతో అభివృద్ధి చేయాలని కేంద్ర పౌర విమానయాన శాఖ మంత్రి కె. రామ్మోహన్ నాయుడును ముఖ్యమంత్రి ఎ. రేవంత్ రెడ్డితో కలిసి వరంగల్ ఎంపీ డా. కడియం కావ్య కోరారు.
ఢిల్లీ పర్యటనలో భాగంగా పార్లమెంట్లోని కేంద్ర మంత్రిగారి చాంబర్లో జరిగిన సమావేశంలో మామునూరు ఎయిర్పోర్ట్ అభివృద్ధిపై సమగ్రంగా చర్చించారు. భూసేకరణ ప్రక్రియ పూర్తయినందున వెంటనే నిర్మాణ పనులు ప్రారంభించాలని విజ్ఞప్తి చేశారు.
కార్గో, ఎంఓఆర్ సదుపాయాలు కూడా అవసరం
మామునూరు ఎయిర్పోర్ట్లో కార్గో సేవలతో పాటు మెయింటెనెన్స్, ఓవర్హాల్ రిపేర్ (ఎంఓఆర్) సదుపాయాలు కల్పించేలా ప్రణాళికలు రూపొందించాలని కోరారు. వరంగల్ నగరం జౌళి సహా పలు పరిశ్రమలతో వేగంగా అభివృద్ధి చెందుతోందని, అంతర్జాతీయ స్థాయి విమానాశ్రయం అవసరం పెరిగిందని వివరించారు.
అలాగే, ఆసియా ఖండంలోనే అతిపెద్ద గిరిజన జాతరగా పేరుగాంచిన సమ్మక్క-సారలమ్మ జాతర ప్రతి రెండేళ్లకోసారి మేడారంలో జరుగుతుందని, దేశ విదేశాల నుంచి భారీగా భక్తులు తరలివస్తారని పేర్కొన్నారు.
కేంద్రం హామీ
మామునూరు ఎయిర్పోర్ట్ పనుల ప్రారంభానికి అవసరమైన చర్యలపై పరిశీలన కోసం ఎయిర్పోర్ట్స్ అథారిటీ ఆఫ్ ఇండియా అధికారులను అక్కడికి పంపిస్తామని కేంద్ర మంత్రి రామ్మోహన్ నాయుడు హామీ ఇచ్చారు.
ఈ సమావేశంలో ఎంపీలు అనిల్ కుమార్ యాదవ్, డా. మల్లు రవి, సురేశ్ షెట్కార్, రామసహాయం రఘురాంరెడ్డి, గడ్డం వంశీకృష్ణతో పాటు ఉన్నతాధికారులు పాల్గొన్నారు.