Meta Platforms ప్రపంచవ్యాప్తంగా భారీ స్థాయిలో ఉద్యోగాల కోత ప్రక్రియను ప్రారంభించినట్లు సమాచారం. ఫేస్బుక్, ఇన్స్టాగ్రామ్, వాట్సాప్ వంటి ప్రముఖ సోషల్ మీడియా వేదికలకు మాతృసంస్థ అయిన మెటా.. తన గ్లోబల్ వర్క్ఫోర్స్లో దాదాపు 10 శాతం మంది ఉద్యోగులను తొలగించే దిశగా చర్యలు చేపట్టినట్లు తెలుస్తోంది. ఈ క్రమంలో సుమారు 8,000 మంది ఉద్యోగులు ప్రభావితమయ్యే అవకాశముందని అంతర్జాతీయ మీడియా నివేదికలు వెల్లడిస్తున్నాయి.
ముఖ్యంగా ఇంజినీరింగ్, ప్రోడక్ట్ డెవలప్మెంట్ విభాగాల్లో ఉద్యోగాల కోత ఎక్కువగా ఉండనున్నట్లు సమాచారం. ఇప్పటికే సింగపూర్లోని మెటా కార్యాలయంలో పనిచేస్తున్న పలువురు ఉద్యోగులకు సంస్థ ఈమెయిల్స్ పంపినట్లు తెలిసింది. అలాగే అమెరికా, ఐరోపా దేశాల్లోని కొంతమంది సిబ్బందికి కూడా వర్క్ ఫ్రమ్ హోమ్ అవకాశాన్ని కల్పిస్తూ, తదుపరి ఉద్యోగాల నుంచి తప్పిస్తున్నట్లు ఈమెయిల్ ద్వారా సమాచారం అందించినట్లు నివేదికలు చెబుతున్నాయి.
Mark Zuckerberg నేతృత్వంలోని మెటా సంస్థ ఈ ఏడాది ఆర్టిఫిషియల్ ఇంటెలిజెన్స్ (AI) రంగంలో భారీగా పెట్టుబడులు పెట్టాలని ప్రణాళికలు రూపొందిస్తున్న సమయంలో ఈ లేఆఫ్స్ చోటుచేసుకోవడం గమనార్హం. AI అభివృద్ధి, సాంకేతిక విస్తరణ కోసం కంపెనీ బిలియన్ల డాలర్లు వెచ్చించేందుకు సిద్ధమవుతోందని సమాచారం. ఈ నేపథ్యంలో ఖర్చులను తగ్గించే వ్యూహంలో భాగంగానే ఉద్యోగాల కోత చేపడుతున్నట్లు విశ్లేషకులు అభిప్రాయపడుతున్నారు.