వరంగల్ నగరంలోని అతిపెద్ద ప్రభుత్వ ఆస్పత్రి అయిన ఎంజీఎం (MGM) లో విజిలెన్స్ అధికారులు ఆకస్మికంగా సోదాలు నిర్వహించడం కలకలం రేపింది. విజిలెన్స్ డీఎస్పీ మల్లయ్య నేతృత్వంలో ఈ తనిఖీలు జరిగాయి.

​అధికారులు ప్రధానంగా ఆస్పత్రిలోని ఆర్థిక వ్యవహారాలు మరియు సేవలపై దృష్టి సారించారు. ఆరోగ్యశ్రీ పథకానికి సంబంధించిన నిధులు ఏవైనా పక్కదారి పట్టాయా అనే కోణంలో విచారణ చేపట్టారు. మందుల కొనుగోళ్లలో జరిగిన అక్రమాలపై ఆరా తీశారు. ముఖ్యంగా ‘బైహ్యాండ్ పర్చేస్’ (నేరుగా కొనుగోలు చేసిన) మందులకు సంబంధించిన రికార్డులను అధికారులు నిశితంగా పరిశీలించారు.

​ రోగులకు అందిస్తున్న భోజనం నాణ్యతను తనిఖీ చేసిన అధికారులు, ప్రభుత్వ మెనూ ప్రకారం ఆహారం అందుతోందా లేదా అని పర్యవేక్షించారు. ​మందుల స్టాక్ రిజిస్టర్లు, బిల్లులు మరియు ఇతర పరిపాలనా సంబంధిత రికార్డులను స్వాధీనం చేసుకున్న అధికారులు, నివేదికను ఉన్నతాధికారులకు సమర్పించనున్నారు.