హైదరాబాద్: బీఆర్ఎస్ వర్కింగ్ ప్రెసిడెంట్ కేటీఆర్ వైఖరిపై రాష్ట్ర పంచాయతీరాజ్ శాఖ మంత్రి సీతక్క నిప్పులు చెరిగారు. వరంగల్ సభలో రాహుల్ గాంధీ, సీఎం రేవంత్ రెడ్డిలపై కేటీఆర్ చేసిన వ్యాఖ్యలు ఆయన అహంకారానికి, దొర ధోరణికి పరాకాష్ట అని ఆమె మండిపడ్డారు.
క్షమాపణ చెప్పాల్సిందే..
రాజకీయాల్లో విమర్శలు సహజమని, కానీ వ్యక్తిగత దూషణలకు దిగడం కేటీఆర్ సంస్కారహీనతకు నిదర్శనమని సీతక్క ధ్వజమెత్తారు. అనుచిత వ్యాఖ్యలు చేసినందుకు కేటీఆర్ తక్షణమే రాహుల్ గాంధీకి, రేవంత్ రెడ్డికి క్షమాపణ చెప్పాలని ఆమె డిమాండ్ చేశారు. ఫామ్హౌస్ సంస్కృతిని, ఫారిన్ టూర్ల అలవాటును వీడి ఇప్పటికైనా బాధ్యతాయుతమైన ప్రతిపక్షంగా వ్యవహరించాలని హితవు పలికారు.
రైతుల విషయంలో విఫలమయ్యారు
బీఆర్ఎస్ హయాంలో రైతు రుణమాఫీ పేరుతో రైతులను వంచించారని సీతక్క విమర్శించారు. నాలుగు విడతల పేరుతో వడ్డీల భారం మోపిన చరిత్ర బీఆర్ఎస్ది అని, కానీ కాంగ్రెస్ ప్రభుత్వం అధికారంలోకి వచ్చిన కేవలం 9 రోజుల్లోనే ₹9,000 కోట్ల రైతు భరోసా నిధులు విడుదల చేసి తన నిబద్ధతను చాటుకుందని స్పష్టం చేశారు. గత ప్రభుత్వం పదేళ్లలో ఇవ్వని పంట బోనస్ను తాము అందిస్తున్నామని ఆమె గుర్తుచేశారు.
కమిషన్ల ఆరోపణలపై ఎద్దేవా
కమిషన్ల గురించి మాట్లాడే హక్కు కేటీఆర్కు లేదని, గతంలో సిరిసిల్ల మున్సిపల్ చైర్పర్సన్ చేసిన ఆరోపణలే ఆయన అవినీతికి నిదర్శనమని ఎద్దేవా చేశారు. చనిపోయిన రైతు కుటుంబాలను గత ప్రభుత్వం కోర్టుల చుట్టూ తిప్పిందని, తమ ప్రభుత్వం మానవత్వంతో ఆ కుటుంబాలను ఆదుకుంటోందని చెప్పారు. సమ్మక్క-సారలమ్మ ఆలయ అభివృద్ధిని చూసి ఓర్వలేకనే కేటీఆర్ అసత్య ప్రచారాలు చేస్తున్నారని ఆగ్రహం వ్యక్తం చేశారు.
ప్రజలు బుద్ధి చెప్పినా మారలేదు
ప్రజలు ఇప్పటికే రెండు ఎన్నికల్లో బీఆర్ఎస్ను పాతరేశారని, ఇప్పటికైనా కేటీఆర్ తన తీరు మార్చుకోకపోతే మరింత నష్టపోతారని హెచ్చరించారు. అహంకారాన్ని వీడి ప్రజల పక్షాన నిలబడాలని సీతక్క సూచించారు.