రాష్ట్రంలోని కోటి మంది మహిళలను కోటీశ్వరులను చేయాలనే పట్టుదలతో ప్రభుత్వం పనిచేస్తోందని పంచాయతీరాజ్, గ్రామీణాభివృద్ధి శాఖ మంత్రి సీతక్క పేర్కొన్నారు. మంగళవారం అసెంబ్లీ సమావేశాల్లో భాగంగా ఆమె మాట్లాడుతూ మహిళా సాధికారతపై కీలక విషయాలను వెల్లడించారు.

​ముఖ్యంగా మేడారం జాతర సందర్భాన్ని పురస్కరించుకుని ప్రభుత్వం రూ. 6 కోట్లతో 565 మంది మహిళలకు దుకాణాలను ఏర్పాటు చేయించిందని ఆమె తెలిపారు. కేవలం 15 రోజుల వ్యవధిలోనే ఈ మహిళలు రూ. 3.33 కోట్ల అదనపు ఆదాయాన్ని గడించడం గమనార్హం. ఇదే స్ఫూర్తితో రాబోయే రోజుల్లో మహిళా పొదుపు సంఘాల బలోపేతానికి, వారిని పారిశ్రామికవేత్తలుగా తీర్చిదిద్దడానికి ప్రభుత్వం పెద్దపీట వేస్తుందని మంత్రి స్పష్టం చేశారు.