పరకాల నియోజకవర్గ స్థాయి ‘ప్రజాపాలన – ప్రగతి ప్రణాళిక’ సమావేశం శనివారం ఘనంగా జరిగింది. ఈ కార్యక్రమంలో వరంగల్ పార్లమెంట్ సభ్యురాలు డాక్టర్ కడియం కావ్య, స్థానిక ఎమ్మెల్యే రేవూరి ప్రకాశ్ రెడ్డితో కలిసి ముఖ్య అతిథిగా పాల్గొన్నారు. నియోజకవర్గ అభివృద్ధి, సంక్షేమ పథకాల అమలుపై అధికారులకు కీలక దిశానిర్దేశం చేశారు.
‘ఇందిరా మహిళా శక్తి’ పథకం ద్వారా మహిళలను పారిశ్రామికవేత్తలుగా తీర్చిదిద్దుతున్నామని ఎంపీ తెలిపారు. పెట్రోల్ బంకులు, సోలార్ ప్లాంట్లు, ధాన్యపు కేంద్రాల నిర్వహణలో మహిళలకు ప్రాధాన్యత ఇస్తూ భారీగా రుణ సదుపాయం కల్పిస్తున్నట్లు పేర్కొన్నారు.
గత ప్రభుత్వం ఇళ్ల నిర్మాణాన్ని నిర్లక్ష్యం చేసిందని విమర్శిస్తూ, కాంగ్రెస్ ప్రభుత్వం ప్రతి నియోజకవర్గానికి 3,600 ఇళ్లను మంజూరు చేసిందని గుర్తుచేశారు. మహాలక్ష్మి, గృహజ్యోతి, రూ. 500లకే గ్యాస్ సిలిండర్ వంటి పథకాలు విజయవంతంగా అందుతున్నాయని తెలిపారు.
ప్రభుత్వ ఆసుపత్రుల్లో ప్రసవాల సంఖ్య పెరగాలని, హెల్త్ సబ్-సెంటర్ల నిర్మాణ పనులను వెంటనే ప్రారంభించాలని అధికారులను ఆదేశించారు. అంగన్వాడీల్లో పిల్లలకు ‘గుడ్ టచ్ – బ్యాడ్ టచ్’పై అవగాహన కల్పించాలని సూచించారు.
కాకతీయ మెగా టెక్స్టైల్ పార్క్ నిధుల కోసం కేంద్రంతో సంప్రదింపులు జరిపామని, త్వరలోనే మరిన్ని నిధులు విడుదలవుతాయని ఆశాభావం వ్యక్తం చేశారు. పరకాలలో డైరీ ప్రాజెక్టు ఏర్పాటుకు పూర్తి సహకారం అందిస్తానని హామీ ఇచ్చారు.
కేంద్రంలోని బీజేపీ ప్రభుత్వం మత రాజకీయాలకు ప్రాధాన్యత ఇస్తోందని, నిత్యావసర ధరల నియంత్రణలో విఫలమైందని విమర్శించారు.
ఈ సమీక్షా సమావేశంలో జిల్లా కలెక్టర్ చాహత్ బాజ్ పాయ్, ZP CEO శేషాద్రి, DRDO శ్రీనివాస్, NPDCL SE మధుసుదన్, RDO నారాయణతో పాటు మున్సిపల్ చైర్మన్లు, ఏఎంసీ చైర్మన్లు, మండల స్థాయి అధికారులు మరియు ప్రజాప్రతినిధులు పాల్గొన్నారు.
పారదర్శకమైన పాలన అందించడమే లక్ష్యమని, ప్రతి పథకం అర్హులైన లబ్ధిదారులకు చేరేలా అధికారులు, నాయకులు సమన్వయంతో పనిచేయాలని డాక్టర్ కడియం కావ్య స్పష్టం చేశారు.