యువతకు ఉపాధి అవకాశాలు కల్పించడమే ప్రభుత్వ లక్ష్యం : ఎంపీ కడియం కావ్య

హనుమకొండలోని కాళోజి కళాక్షేత్రంలో తెలంగాణ ప్రభుత్వం ప్రతిష్టాత్మకంగా నిర్వహిస్తున్న ‘ప్రజా పాలన – ప్రగతి ప్రణాళిక’ కార్యక్రమంలో భాగంగా ఏర్పాటు చేసిన మెగా జాబ్ మేళాలో రాష్ట్ర పర్యావరణ, దేవాదాయ శాఖ మంత్రి కొండ సురేఖ, ఎమ్మెల్యే కేఆర్ నాగరాజుతో కలిసి వరంగల్ పార్లమెంట్ సభ్యురాలు డాక్టర్ కడియం కావ్య పాల్గొన్నారు.

ఈ సందర్భంగా జాబ్ మేళాలో ఏర్పాటు చేసిన 72 ప్రముఖ కంపెనీల స్టాల్స్‌ను ఎంపీ సందర్శించి అభ్యర్థులతో మాట్లాడారు. వివిధ రంగాల్లో యువతకు ఉపాధి అవకాశాలు కల్పించేందుకు కంపెనీలు ముందుకు రావడం సంతోషకరమన్నారు.

సమావేశంలో మాట్లాడిన ఎంపీ డాక్టర్ కడియం కావ్య.. యువతకు ఉపాధి అవకాశాలు కల్పించడమే కాంగ్రెస్ ప్రభుత్వ ప్రధాన లక్ష్యమని పేర్కొన్నారు. ప్రపంచవ్యాప్తంగా ఉద్యోగ రంగంలో సవాళ్లు పెరుగుతున్నప్పటికీ యువత నిరాశ చెందకుండా తమ నైపుణ్యాలను పెంపొందించుకోవాలని సూచించారు.

“నిత్య విద్యార్థిగా ఉంటేనే జీవితంలో ఎదుగుదల సాధ్యమవుతుంది. రాయిని పదును పెడితేనే డైమండ్ అవుతుంది” అంటూ యువతలో ఆత్మవిశ్వాసం నింపారు. ఉద్యోగం వచ్చిన తర్వాత కూడా కొత్త విషయాలు నేర్చుకోవడం ఆపకూడదన్నారు.

ఫిజికల్ హెల్త్‌తో పాటు మెంటల్ హెల్త్ కూడా ఎంతో ముఖ్యమని పేర్కొన్న ఎంపీ.. ప్రతిరోజూ మెడిటేషన్, పాజిటివ్ థింకింగ్ అలవాటు చేసుకోవాలని సూచించారు. “ప్రపంచంతో యుద్ధం చేస్తే అలెగ్జాండర్.. నీతో నువ్వు యుద్ధం చేస్తే బుద్ధుడు” అంటూ యువతకు ప్రత్యేక సందేశం ఇచ్చారు.

ప్రభుత్వ ఉద్యోగాలకే పరిమితం కాకుండా స్టార్టప్స్, వ్యాపారాలు, ప్రైవేట్ రంగ అవకాశాల వైపు కూడా యువత దృష్టి సారించాలని ఎంపీ కడియం కావ్య సూచించారు. ఒక అవకాశం కోల్పోయినా మరో అవకాశం కోసం ప్రయత్నించే ధైర్యం ఉండాలని పిలుపునిచ్చారు.

ఈ కార్యక్రమంలో జిల్లా కలెక్టర్ సత్య శారద, జిల్లా అధికారులు, ప్రజాప్రతినిధులు తదితరులు పాల్గొన్నారు.