ప్రభుత్వ పాఠశాలల బలోపేతానికి ముప్పారం గ్రామంలో వినూత్న నిర్ణయం :

హనుమకొండ జిల్లా ధర్మసాగర్ మండలంలోని ముప్పారం గ్రామపంచాయతీ ప్రభుత్వ పాఠశాలల్లో విద్యార్థుల సంఖ్య పెంపు లక్ష్యంగా వినూత్న చర్యలకు శ్రీకారం చుట్టింది. ముప్పారం గ్రామంలో ప్రభుత్వ పాఠశాలల్లో పిల్లల చేరికలు తగ్గుతున్న నేపథ్యంలో సర్పంచ్ గుంటిపల్లి రేణుక ఆధ్వర్యంలో గ్రామపంచాయతీ ప్రత్యేక తీర్మానం చేసింది.

ఈ తీర్మానం ప్రకారం గ్రామంలోని తల్లిదండ్రులు తమ పిల్లలను ప్రభుత్వ పాఠశాలల్లో చేర్పించేందుకు ప్రోత్సహించే చర్యలు చేపట్టనున్నారు. ప్రభుత్వ పాఠశాలలో చేరే విద్యార్థులకు షూలు, బెల్టులు వంటి అవసరమైన వస్తువులను అందజేస్తామని గ్రామపంచాయతీ హామీ ఇచ్చింది. అలాగే గ్రామంలో ఇంటింటికీ వెళ్లి ప్రభుత్వ పాఠశాలల ప్రాధాన్యతపై అవగాహన కల్పిస్తూ అడ్మిషన్ల కోసం ప్రత్యేక ప్రచారం నిర్వహిస్తున్నారు.

అంతేకాకుండా గ్రామ వార్డు సభ్యులకు కూడా ప్రోత్సాహకాలు ప్రకటించారు. ఏ వార్డు సభ్యుడైనా కనీసం 11 మంది విద్యార్థులను ప్రభుత్వ పాఠశాలలో చేర్పిస్తే రూ.5,000 నగదు బహుమతి అందజేస్తామని వెల్లడించారు. ఈ నిర్ణయం గ్రామంలో చర్చనీయాంశంగా మారింది.

ప్రభుత్వ పాఠశాలల్లో చేరికలను పెంచేందుకు మరో కీలక ప్రతిపాదనను కూడా గ్రామపంచాయతీ ముందుకు తెచ్చింది. ప్రైవేటు పాఠశాలలకు పిల్లలను పంపకుండా ప్రభుత్వ పాఠశాలల్లో చేర్పించిన కుటుంబాలకు ఇంటి పన్ను, నీటి పన్నుల్లో రాయితీలు కల్పించే అంశాన్ని పరిశీలిస్తున్నట్లు తెలిపింది.

ప్రభుత్వ విద్యను బలోపేతం చేయడం, గ్రామీణ ప్రాంతాల్లో ప్రభుత్వ పాఠశాలలపై ప్రజల్లో విశ్వాసాన్ని పెంచడం లక్ష్యంగా ఈ చర్యలు చేపట్టినట్లు గ్రామపంచాయతీ ప్రతినిధులు పేర్కొన్నారు. ముప్పారం గ్రామం తీసుకున్న ఈ వినూత్న నిర్ణయం ఇతర గ్రామాలకు కూడా ఆదర్శంగా నిలుస్తుందనే అభిప్రాయాలు వ్యక్తమవుతున్నాయి.