“జోసా” కౌన్సెలింగ్పై అవగాహన కోసం వరంగల్ ఎన్ఐటీ ‘ఓపెన్ హౌస్’ :
హనుమకొండ: దేశంలోని ఐఐటీలు, ఎన్ఐటీలు, ఐఐఐటీలు మరియు ఇతర కేంద్ర ప్రభుత్వ విద్యాసంస్థల్లో ప్రవేశాల కోసం నిర్వహించే “జాయింట్ అలోకేషన్ అథారిటీ (జోసా)” 2026 కౌన్సిలింగ్ ప్రక్రియపై విద్యార్థులు , తల్లిదండ్రులకు అవగాహన కల్పించేందుకు వరంగల్ ఎన్ఐటీ ప్రత్యేక కార్యక్రమాన్ని నిర్వహించనుంది. ఈ నెల 9న ఉదయం 10 గంటలకు “ఎన్ఐటి” క్యాంపస్ లోని అంబేద్కర్ లెర్నింగ్ సెంటర్లో “ఓపెన్ హౌస్” కార్యక్రమం జరగనుంది.
ఈ కార్యక్రమంలో పాల్గొనే విద్యార్థులు, తల్లిదండ్రులకు సంస్థలో అందుబాటులో ఉన్న విద్యా అవకాశాలు, మౌలిక సదుపాయాలు, పరిశోధన మరియు ఆవిష్కరణ కార్యక్రమాలు, ప్లేస్మెంట్ అవకాశాలు, విద్యార్థి సహాయక సేవలు, క్యాంపస్ జీవన విధానం వంటి అంశాలపై సమగ్ర సమాచారం అందించనున్నారు. తద్వారా ఉన్నత విద్యకు సంబంధించిన నిర్ణయాలను సరైన సమాచారంతో తీసుకునే అవకాశం లభించనుంది.
వరంగల్ ఎన్ఐటీ డైరెక్టర్ ప్రొఫెసర్ బిద్యాధర్ సుబుధితో పాటు డీన్లు, విభాగాధిపతులు, అధ్యాపకులు, విద్యార్థి ప్రతినిధులు ఈ కార్యక్రమంలో పాల్గొని విద్యార్థులకు మార్గనిర్దేశం చేయనున్నారు. జోసా కౌన్సిలింగ్లో శాఖల ఎంపిక, సీట్ల కేటాయింపు విధానం, విద్యా కార్యక్రమాలు, హాస్టల్ సదుపాయాలు, క్యాంపస్ లోని ఇతర అవకాశాలపై సందేహాలను నేరుగా నివృత్తి చేసుకునే అవకాశం కల్పించనున్నారు.
అలాగే ప్రస్తుతం ఎన్ఐటీలో చదువుతున్న విద్యార్థులతో ప్రత్యక్షకంగా మాట్లాడి వారి అనుభవాలను తెలుసుకునే అవకాశం కూడా ఉంటుంది. ప్రత్యేకంగా హాజరు కాలేని విద్యార్థులు తల్లిదండ్రుల కోసం కార్యక్రమాన్ని వరంగల్ ఎన్ఐటి అధికార యూట్యూబ్ ఛానల్ లో ప్రత్యక్ష ప్రసారం చేయనున్నారు . లైవ్ స్ట్రీమింగ్ లింక్: https://youtube.com/live/HsrZFv7N1m?feature=share. జోసా కౌన్సిలింగ్ కి సిద్ధమవుతున్న విద్యార్థులకు ఈ కార్యక్రమం ఎంతో ఉపయోగకరంగా ఉండనుంది అని నిర్వాహకులు తెలిపారు.