ఊరుగొండ సమీపంలో ఘోర రోడ్డు ప్రమాదం.. ఒకరు మృతి, ఇద్దరికి తీవ్ర గాయాలు :

హనుమకొండ జిల్లాలోని దామెర మండలం ఊరుగొండ సమీపంలో జాతీయ రహదారిపై గురువారం జరిగిన రోడ్డు ప్రమాదం విషాదాన్ని మిగిల్చింది. పవర్ గ్రిడ్ కేంద్రం వద్ద రహదారి పక్కన ఆగి ఉన్న నీటి ట్యాంకర్ లారీని వెనుక నుంచి మరో లారీ బలంగా ఢీకొనడంతో ఈ ప్రమాదం చోటుచేసుకుంది.

ప్రమాదం లో ఢీకొట్టిన లారీ ముందు భాగం పూర్తిగా నుజ్జు నుజ్జు అయిపోయిందని స్థానికులు తెలిపారు. ఘటనలో ఒకరు స్పాట్ లో మృతి చెందగా, మరో ఇద్దరు తీవ్రంగా గాయపడ్డారు. ప్రమాదాన్ని గమనించిన స్థానికులు వెంటనే పోలీసులకు సమాచారం అందించడంతో పాటు గాయపడిన వారిని ఆస్పత్రికి తరలించే ఏర్పాట్లు చేశారు.

సమాచారం అందుకున్న పోలీసులు వెంటనే ఘటనాస్థలికి చేరుకుని పూర్తి సహాయక చర్యలు చేపట్టారు. గాయపడిన వారిని సమీపంలోని ఆస్పత్రికి తరలించి చికిత్స అందిస్తున్నారు. వారి ఆరోగ్య పరిస్థితిపై ఇంకా పూర్తి సమాచారం అందాల్సి ఉంది.

ప్రమాదం కారణంగా కొంతసేపు జాతీయ రహదారిపై వాహనాల రాకపోకలకు అంతరాయం ఏర్పడింది. పోలీసులు ట్రాఫిక్‌ను నియంత్రించి వాహనాల రాకపోకలను పునరుద్ధరించారు. ప్రమాదానికి గల కారణాలపై దర్యాప్తు కొనసాగుతోంది.

మృతుడి వివరాలు, గాయపడిన వారి గుర్తింపు, ప్రమాదం జరిగిన ఖచ్చిత పరిస్థితులపై అధికారులు వివరాలు సేకరిస్తున్నారు. ఈ ఘటనకు సంబంధించిన పూర్తి సమాచారం ఇంకా తెలియాల్సి ఉంది. స్థానికంగా ఈ ప్రమాదం తీవ్ర విషాదాన్ని నింపింది.

Read Warangal News and Latest Politics News and Real Estate