హైదరాబాద్: ఔటర్ రింగ్ రోడ్డుపై శుక్రవారం తెల్లవారుజామున అత్యంత విషాదకర ఘటన చోటుచేసుకుంది. యాదగిరిగుట్ట నుంచి స్వర్ణగిరి దర్శనం ముగించుకుని తిరిగి వస్తున్న ఒక కారు, నిలిపి ఉంచిన లారీని వెనుక నుంచి బలంగా ఢీకొట్టింది. ఈ ప్రమాదంలో ఒకే కుటుంబానికి చెందిన ఆరుగురు వ్యక్తులు అక్కడికక్కడే మరణించారు.
యాదగిరిగుట్ట నుండి హైదరాబాద్ వస్తున్న కారు (TS 23F 2298), 16వ ఎగ్జిట్ పాయింట్ వద్ద రోడ్డు పక్కన ఆగి ఉన్న లారీని అతివేగంగా ఢీకొట్టింది. వేగం ధాటికి కారు సగభాగం లారీ కిందకు దూసుకువెళ్లి పూర్తిగా నుజ్జునుజ్జయింది. కారులో మొత్తం ఏడుగురు ప్రయాణిస్తుండగా, ఆరుగురు ప్రాణాలు కోల్పోయారు.
మృతులు సిరిసిల్లకు చెందిన వారుగా గుర్తించారు. వీరంతా ప్రస్తుతం హైదరాబాద్లోని సనత్ నగర్లో నివసిస్తున్నారు. మరణించిన వారిలో ఇద్దరు చిన్నారులు కూడా ఉండటం అత్యంత బాధాకరం.
శ్రీనివాస్, శివ, లాస్య, మాధవ్, కృష్ణచంద్ర, రిషిక. శ్వేత అనే మహిళకు తీవ్ర గాయాలవ్వగా, ప్రస్తుతం ఆమె పరిస్థితి విషమంగా ఉంది. ఆమెను చికిత్స నిమిత్తం సమీప ఆసుపత్రికి తరలించారు.
మృతులంతా ఆలయంలో తీసుకున్న చివరి ఫోటో ఇప్పుడు సామాజిక మాధ్యమాల్లో వైరల్ అవుతోంది. దైవదర్శనం చేసుకుని సంతోషంగా ఇంటికి తిరిగి వస్తుండగా, ఇంతలోనే మృత్యువు కబళించడం అందరినీ కలిచివేస్తోంది. ఘటనా స్థలానికి చేరుకున్న పోలీసులు కేసు నమోదు చేసుకుని దర్యాప్తు చేస్తున్నారు. అతివేగమే ఈ ప్రమాదానికి ప్రధాన కారణమని ప్రాథమికంగా భావిస్తున్నారు.