పద్మాక్షి కాలనీ శ్మశాన వాటికలో ప్రత్యేక గది నిర్మాణానికి స్థల పరిశీలన కలెక్టర్, కుడా ఛైర్మన్, ఎమ్మెల్యే సంయుక్తంగా పరిశీలించారు
- ఎన్జీవో ప్రతినిధి అనితా రెడ్డి చొరవ: అద్దె ఇళ్లలో మరణించిన నిరుపేదలు, అనాథల అంత్యక్రియలకు ఎలాంటి ఇబ్బంది కలగకుండా ప్రత్యేక గదిని నిర్మించేందుకు ముందుకొచ్చారు.
- ప్రభుత్వం నుంచి పూర్తి సహకారం: ప్రాజెక్టుకు అన్ని విధాలా తోడ్పాటు అందిస్తామని అధికారులు హామీ ఇచ్చారు.
హనుమకొండ: అద్దె ఇళ్లలో ఎవరైనా మరణిస్తే భౌతికకాయాన్ని ఇంటి వద్ద ఉంచేందుకు యజమానులు అంగీకరించకపోవడం, అనాథలకు తలెత్తే సమస్యలను దృష్టిలో ఉంచుకుని సామాజిక కార్యకర్త, ఎన్జీవో ప్రతినిధి అనితా రెడ్డి గారు కీలక నిర్ణయం తీసుకున్నారు. హనుమకొండ పద్మాక్షి కాలనీలోని శ్మశాన వాటికలో భౌతికకాయాన్ని గౌరవంగా ఉంచేందుకు వీలుగా ప్రత్యేక గదిని నిర్మించనున్నారు.
ఈ కార్యక్రమంలో భాగంగా ఆదివారం హనుమకొండ జిల్లా కలెక్టర్ ఛాహత్ బాజ్పాయ్, వరంగల్ పశ్చిమ ఎమ్మెల్యే నాయిని రాజేందర్ రెడ్డి, కుడా చైర్మన్, హనుమకొండ డీసీసీ అధ్యక్షులు ఇనగాల వెంకట్రామ్ రెడ్డి గార్లు ఎన్జీవో ప్రతినిధి అనితా రెడ్డి గారితో కలిసి స్థలాన్ని, శ్మశాన వాటిక పరిసరాలను పరిశీలించారు.
ఈ సందర్భంగా వారు మాట్లాడుతూ.. నిరుపేదలు, అనాథలు మరణించినప్పుడు ఎదురయ్యే ఇబ్బందులను గుర్తించి మానవీయ కోణంలో స్పందించిన అనితా రెడ్డి గారిని అభినందించారు. అంతిమ సంస్కారాలు గౌరవప్రదంగా జరిగేలా చేపట్టిన ఈ నిర్మాణానికి ప్రభుత్వం, అధికారుల తరఫున సంపూర్ణ సహకారం అందిస్తామని స్పష్టం చేశారు. ఈ కార్యక్రమంలో స్థానిక ప్రజాప్రతినిధులు, అధికారులు, ఎన్జీవో సభ్యులు పాల్గొన్నారు.