పరకాలలో బుధవారం బీజేపీ పట్టణ అధ్యక్షుడు గాజుల నిరంజన్ ఆధ్వర్యంలో నిర్వహించిన విలేకరుల సమావేశంలో మాజీ ఎమ్మెల్యే చల్లా ధర్మారెడ్డి చేస్తున్న రాజకీయ తీరును తీవ్రంగా ఖండించారు బీజేపీ కాంటెస్టెడ్ ఎమ్మెల్యే డాక్టర్ కాళీ ప్రసాద్ రావు.
అధికారంలో ఉన్నప్పుడు సంపాదించిన డబ్బుతో ఇతర పార్టీల అభ్యర్థులను కొనుగోలు చేయడం, బెదిరింపులు ఇవ్వడం ప్రజాస్వామ్యానికి దెబ్బతీసే చర్యలని ఆయన అన్నారు.
బీఆర్ఎస్ పార్టీ పతనం మొదలైందని, ఇలాంటి నీచ రాజకీయాలతో ప్రజలు వారిని తిరస్కరిస్తారని హెచ్చరించారు.
మున్సిపల్ ఎన్నికల కన్వీనర్ డాక్టర్ సంతోష్ కుమార్ మాట్లాడుతూ, మాజీ ఎమ్మెల్యే ధర్మారెడ్డి ఆర్థిక అహంకారంతో బీజేపీ అభ్యర్థిని కొనుగోలు చేయడానికి ప్రయత్నించడం సిగ్గుచేటని విమర్శించారు.
గతంలో బీఆర్ఎస్ ఇలాంటి రాజకీయాలు చేసినందుకు ప్రజలు గుణపాఠం చెప్పారని, మళ్లీ అదే తప్పు చేయడం హాస్యాస్పదమని అన్నారు.
బీజేపీ అభ్యర్థులు డబ్బుతో కాకుండా అభివృద్ధి కోసమే రాజకీయాల్లోకి వస్తారని స్పష్టం చేశారు.
హనుమకొండ జిల్లా బీజేపీ అధ్యక్షుడు కొలను సంతోష్ రెడ్డి మాట్లాడుతూ, బీజేపీ అభ్యర్థిని బెదిరించి కొనుగోలు చేయడానికి చేసిన ప్రయత్నాలు ప్రజాస్వామ్యంపై దాడికి సమానమని అన్నారు. మున్సిపల్ ఎన్నికల్లో బీఆర్ఎస్ పార్టీకి ప్రజలు తగిన బుద్ధి చెప్పాలని పిలుపునిచ్చారు.
డాక్టర్ కాళీ ప్రసాద్ రావు మరింత తీవ్రంగా విమర్శిస్తూ, బీజేపీ అభ్యర్థిని బెదిరించి కొనుగోలు చేసిన బీఆర్ఎస్ పార్టీకి పతనం తప్పదని, గతంలో బీఫారమ్లతో గెలిచిన ఎమ్మెల్యేలపై కేటీఆర్ చేసిన వ్యాఖ్యలు ధర్మారెడ్డికి గుర్తున్నాయా అని ప్రశ్నించారు.
14వ వార్డులో జరిగిన ఘటన ఓటర్లను అవమానించే నీచ రాజకీయాలకు ఉదాహరణ అని, ప్రజాస్వామ్యాన్ని కాపాడాలంటే బీజేపీని గెలిపించాలని ప్రజలను కోరారు.
ఈ సమావేశంలో రాష్ట్ర కార్యవర్గ సభ్యులు కాచం గురు ప్రసాద్, జిల్లా ప్రధాన కార్యదర్శి దేవనూరి మేఘనాథ్, పరకాల పట్టణ ప్రధాన కార్యదర్శి సంఘ పురుషోత్తం, నడికుడ మండల అధ్యక్షుడు ఎరుకల దివాకర్, బాసాని సోమరాజు, చంద్రమౌళి, సల్పల సురేష్ తదితరులు పాల్గొన్నారు.