తెలంగాణ సిద్ధాంతకర్త, తెలంగాణ ఉద్యమానికి మార్గదర్శకుడైన ప్రొఫెసర్ కొత్తపల్లి జయశంకర్ గారి వర్ధంతిని పురస్కరించుకుని హనుమకొండ బాలసముద్రంలోని ఏకశిలా పార్క్ లో ఏర్పాటు చేసిన ఆయన విగ్రహానికి ప్రజాప్రతినిధులు, నాయకులు పూలమాలలు వేసి ఘనంగా నివాళులర్పించారు.
ఈ కార్యక్రమంలో వరంగల్ పశ్చిమ నియోజకవర్గ ఎమ్మెల్యే నాయిని రాజేందర్ రెడ్డి, ఎమ్మెల్సీ బస్వరాజు సారయ్య, తెలుగు అకాడమీ చైర్మన్ కూరపాటి వెంకటనారాయణ, యువ నాయకుడు విష్ణు రెడ్డి తదితరులు పాల్గొన్నారు.
ఈ సందర్భంగా ఎమ్మెల్యే నాయిని రాజేందర్ రెడ్డి మాట్లాడుతూ, తెలంగాణ రాష్ట్ర సాధన కోసం ప్రొఫెసర్ జయశంకర్ జీవితాంతం అహర్నిశలు కృషి చేశారని అన్నారు. ప్రాంతం, వర్గం, కులం, మత భేదాలకు అతీతంగా ప్రజలను ఏకం చేసి తెలంగాణ ఆకాంక్షను ఉద్యమంగా మలిచిన గొప్ప దార్శనికుడు జయశంకర్ అని కొనియాడారు.
తెలంగాణ ప్రజల ఆత్మగౌరవం, స్వయం పాలన, సమాన అభివృద్ధి కోసం ఆయన దశాబ్దాల పాటు చేసిన పోరాటం చిరస్మరణీయమని పేర్కొన్నారు. జయశంకర్ చూపిన మార్గంలోనే రాష్ట్ర అభివృద్ధికి కాంగ్రెస్ ప్రభుత్వం కట్టుబడి పనిచేస్తోందని తెలిపారు.
ప్రజా సంక్షేమం, రైతు సంక్షేమం, మహిళా సాధికారత, విద్యా మరియు ఉపాధి రంగాల అభివృద్ధికి రాష్ట్ర ప్రభుత్వం ప్రాధాన్యత ఇస్తోందని చెప్పారు. జయశంకర్ కలలు కన్న సామాజిక న్యాయం, సమగ్ర అభివృద్ధి లక్ష్యాల సాధన దిశగా ప్రభుత్వం ముందుకు సాగుతోందని పేర్కొన్నారు.
ఈ సందర్భంగా నాయకులు ప్రొఫెసర్ జయశంకర్ తెలంగాణ రాష్ట్ర సాధన కోసం చేసిన సేవలను స్మరించుకుని, ఆయన ఆశయ సాధనకు కట్టుబడి పనిచేయాలని పిలుపునిచ్చారు.
కార్యక్రమంలో మాజీ కార్పొరేటర్లు తోట వెంకటేశ్వర్లు, పోతుల శ్రీమాన్, మాధవి రెడ్డి, బంక సరళ సంపత్, అంకుస్, నాగరాజు, రాజ్ కుమార్, సారంగం, రమేష్ తదితరులు పాల్గొన్నారు.