ఉచిత ప్రయాణంపై రైల్వే బోర్డు కఠిన నిర్ణయం.. ఎంఎంటీఎస్ ప్రయాణికులకు నిరాశ :

హైదరాబాద్ నగర పరిధిలో నడిచే ఎంఎంటిఎస్ (మల్టీ మోడల్ ట్రాన్స్పోర్ట్ సిస్టం) రైల్లలో ఉచిత ప్రయాణ సౌకర్యం కల్పించాలన్న తెలంగాణ రాష్ట్ర ప్రభుత్వ ప్రతిపాదనకు రైల్వే బోర్డు తిరస్కారం తెలిపింది. ఈ మేరకు రాష్ట్ర ప్రభుత్వానికి రైల్వే అధికారులు లేక ద్వార తమ అభిప్రాయాన్ని వెల్లడించారు.

రైల్వే శాఖ ఇప్పటికే ఎంఎంటిఎస్ సేవల నిర్వహణలో భారీ ఆర్థిక నష్టాలను ఎదుర్కొంటుందని అధికారులు పేర్కొన్నారు. గత ఏడాదిలోనే ఎంఎంటిఎస్ కార్యకలాపాల వల్ల సుమారు 160 కోట్ల మేర నష్టం వాటిని వెల్లడించారు. అదనంగా రాష్ట్ర ప్రభుత్వం చెల్లించాల్సిన 490 కోట్ల బకాయిలు ఇంకా పెండింగ్ లోనే ఉన్నాయని లేఖలో ప్రస్తావించారు.

జూన్ 2వ తేదీ నుంచి ఎంఎంటిఎస్ రైళ్లల్లో ప్రయాణికులకు ఉచిత ప్రయాణం కల్పించే అంశాన్ని రాష్ట్ర ప్రభుత్వం ప్రతిపాదించిన నేపథ్యంలో రైల్వే బోర్డు దీనిపై సమగ్రంగా పరిశీలన చేపట్టింది. అయితే ఇప్పటికే నష్టాల్లో కొనసాగుతున్న సేవలకు మరింత ఆర్థిక భారం పడే అవకాశం ఉందని అధికారులు అభిప్రాయపడ్డారు.

అయితే ఉచిత ప్రయాణ పథకం అమలుతో ఏర్పడే మొత్తం ఆర్థిక భారాన్ని రాష్ట్ర ప్రభుత్వమే భరిస్తామని స్పష్టమైన హామీ ఇస్తే ప్రతిపాదనను పునర్విమర్శించేందుకు సిద్ధంగా ఉన్నామని రైల్వే బోర్డ్ పేర్కొంది. ఈ పరిణామంతో ఎంఎంటిఎస్ ఉచిత ప్రయాణ ప్రతిపాదన అమలుపై ప్రస్తుతం అనిశ్చితి నెలకొంది. రాష్ట్ర ప్రభుత్వం తదుపరి ఏ విధమైన నిర్ణయం తీసుకుంటుందన్నది ఆసక్తికరంగా మారింది.