ప్రయాణం అంటేనే ఎన్నో ఆశలు, మరెన్నో అంచనాలు.. కానీ దక్షిణ ఎక్స్‌ప్రెస్‌లో ప్రయాణిస్తున్న లక్ష్మికి అది అస్సలు ఊహించని ప్రయాణంగా మారింది. అర్ధరాత్రి వేళ పురిటి నొప్పులు మొదలై, ప్రాణాలు గాల్లో కలిసినంత పనైంది.

కానీ, కాజీపేట స్టేషన్‌లో వారికి అండగా నిలిచారు 108 అంబులెన్స్ సిబ్బంది. క్షణం కూడా ఆలస్యం చేయకుండా, అత్యవసర పరిస్థితిని అంచనా వేసి.. ఆ అంబులెన్స్‌నే ప్రసూతి గదిగా మార్చేశారు. ఈఎంటీ శివకుమార్, పైలెట్ కుమారస్వామి చూపిన చొరవతో లక్ష్మి పండంటి ఆడబిడ్డకు జన్మనిచ్చింది. ప్రస్తుతం తల్లీబిడ్డ ఇద్దరూ క్షేమంగా ఉన్నారు.

రైల్వే అధికారులు కూడా వెంటనే స్పందించి, ఆ సిబ్బందిని ప్రత్యేకంగా అభినందించారు. ఆ తర్వాత తల్లీబిడ్డలకు మెరుగైన వైద్యం కోసం వారిని హనుమకొండ జీఎంహెచ్‌ (GMH)కు తరలించారు.

కష్టకాలంలో దేవుడిలా వచ్చి ఆదుకున్న 108 సిబ్బందికి అభినందనలు.