ఆర్టీసీ కార్మికుల సమ్మె నేపథ్యంలో ఆత్మహత్యాయత్నానికి పాల్పడిన నర్సంపేట డిపో డ్రైవర్ శంకర్ గౌడ్ (45) చికిత్స పొందుతూ కన్నుమూశారు. ఈ ఘటనతో ఉమ్మడి వరంగల్ జిల్లాలో విషాదఛాయలు అలముకోగా, కార్మిక వర్గాల్లో తీవ్ర ఆగ్రహం వ్యక్తమవుతోంది.
ఆర్టీసీ సమ్మె పరిష్కారం కాకపోవడం, ప్రభుత్వ తీరుతో మనస్తాపం చెందిన శంకర్ గౌడ్, నర్సంపేట బస్టాండ్ ఎదుట ఒంటిపై పెట్రోల్ పోసుకుని నిప్పు అంటించుకున్నారు. 80 శాతం గాయాలతో పరిస్థితి విషమించడంతో ఆయనను ఎంజీఎం నుండి హైదరాబాద్ నిమ్స్ (NIMS) ఆసుపత్రికి తరలించారు. అక్కడ ప్రాణాలతో పోరాడుతూ శంకర్ తుదిశ్వాస విడిచారు.
శంకర్ మృతిపై బీఆర్ఎస్ రాష్ట్ర నాయకుడు ఏనుగుల రాకేష్ రెడ్డి తీవ్రంగా స్పందించారు. హనుమకొండలో ఆర్టీసీ కార్మికుల నిరసనకు మద్దతు తెలిపిన అనంతరం ఆయన మీడియాతో మాట్లాడారు.
ఎన్నికలకు ముందు ఆర్టీసీ కార్మికులకు ఇచ్చిన ఏ ఒక్క హామీని ప్రభుత్వం నిలబెట్టుకోలేదని ఆయన విమర్శించారు.
శంకర్ మృతికి ప్రభుత్వ నిర్లక్ష్యమే కారణమని, ఇది ముమ్మాటికీ ప్రభుత్వ హత్యేనని ఆరోపించారు.
ఇప్పటికైనా ప్రభుత్వం మొండివైఖరి వీడి, ఆర్టీసీ కార్మికుల సమస్యలను తక్షణమే పరిష్కరించాలని డిమాండ్ చేశారు.
శంకర్ మృతి వార్త తెలియగానే వరంగల్, హనుమకొండ పరిసరాల్లోని డిపోల వద్ద కార్మికులు పెద్ద ఎత్తున నిరసనకు దిగారు. శంకర్ కుటుంబాన్ని ప్రభుత్వం ఆదుకోవాలని, తమ 32 డిమాండ్లను తక్షణమే ఆమోదించాలని నినదిస్తున్నారు.
ప్రస్తుతం శంకర్ మృతదేహానికి పోస్టుమార్టం నిర్వహించి వరంగల్కు తరలించేందుకు ఏర్పాట్లు జరుగుతున్నాయి. ఎలాంటి అవాంఛనీయ సంఘటనలు జరగకుండా నగరంలో పోలీసులు భారీగా మోహరించారు.