హన్మకొండ/ములుగు: ఆసియాలోనే అతిపెద్ద గిరిజన పండుగ మేడారం సమ్మక్క-సారలమ్మ జాతర భక్తులకు ఈసారి సరికొత్త అనుభూతిని పంచనుంది. జాతరను పురస్కరించుకుని పర్యాటక శాఖ ఆధ్వర్యంలో ఏర్పాటు చేసిన హెలికాప్టర్ సర్వీసులను రాష్ట్ర పంచాయతీరాజ్, గ్రామీణాభివృద్ధి శాఖ మంత్రి సీతక్క ఘనంగా ప్రారంభించారు.
కాలినడక నుంచి హెలికాప్టర్ దాకా
ఈ సందర్భంగా మంత్రి సీతక్క మాట్లాడుతూ జాతర ప్రయాణంలో వచ్చిన మార్పులను గుర్తు చేసుకున్నారు. “మా చిన్నతనంలో ఊరి నుంచి మేడారానికి మూడు రోజుల ముందుగానే కాలినడకన బయలుదేరేవాళ్ళం. ఆ తర్వాత ఎడ్ల బండ్లు, కార్లు వచ్చాయి.
ఇప్పుడు ఏకంగా హెలికాప్టర్ సేవలు అందుబాటులోకి రావడం జాతర ఎంతగా అభివృద్ధి చెందిందో చెబుతోంది” అని ఆమె వ్యాఖ్యానించారు. భక్తులు, పర్యాటకులు ఈ సేవలను సద్వినియోగం చేసుకోవాలని ఆమె కోరారు.
హన్మకొండలోని ములుగు ప్రభుత్వ డిగ్రీ కళాశాల గ్రౌండ్ నుంచి ఈ సర్వీసులు ప్రారంభమయ్యాయి. పర్యాటక శాఖ సమన్వయంతో తుంబి ఏవియేషన్ సంస్థ ఈ హెలికాప్టర్ రైడ్లను నిర్వహిస్తోంది.
హన్మకొండ నుంచి మేడారానికి వెళ్లేందుకు షటిల్ సర్వీసులతో పాటు, మేడారం పరిసరాలను గగనతలం నుండి వీక్షించేలా ‘జాయ్ రైడింగ్’ సౌకర్యాన్ని కూడా కల్పించారు. అదనపు కలెక్టర్ సంపత్ రావు, గ్రంథాలయ సంస్థ చైర్మన్ రవి చందర్ తొలి జాయ్ రైడింగ్లో పాల్గొని ములుగు గగనతలంలో విహరించారు.
జాతర వైభవాన్ని ఆకాశం నుండి చూసే అవకాశం రావడంపై భక్తులు హర్షం వ్యక్తం చేస్తున్నారు.