కేంద్ర ప్రభుత్వ ఉద్యోగాల కోసం సిద్ధమవుతున్న అభ్యర్థులకు స్టాఫ్ సెలక్షన్ కమిషన్ (SSC) కీలక సమాచారం వెల్లడించింది. కంబైన్డ్ గ్రాడ్యుయేట్ లెవెల్ (CGL) ఎగ్జామినేషన్-2026కు సంబంధించిన పరీక్షల షెడ్యూల్‌ను కమిషన్ తాజాగా ప్రకటించింది. షెడ్యూల్ ప్రకారం SSC CGL టైర్-1, టైర్-2 పరీక్షలను ఈ నెల 30 నుంచి అక్టోబర్ 30 వరకు నిర్వహించనున్నారు. పరీక్షలు కంప్యూటర్ బేస్డ్ టెస్ట్ (CBT) విధానంలో జరుగుతాయి.

టైర్-1 పరీక్ష విధానం :

SSC CGL టైర్-1 పరీక్ష ఆబ్జెక్టివ్ విధానంలో మల్టిపుల్ ఛాయిస్ ప్రశ్నలతో ఉంటుంది. ఇందులో జనరల్ ఇంటెలిజెన్స్ అండ్ రీజనింగ్, జనరల్ అవేర్‌నెస్, క్వాంటిటేటివ్ ఆప్టిట్యూడ్, ఇంగ్లిష్ కాంప్రహెన్షన్ అనే నాలుగు విభాగాలు ఉంటాయి. ఒక్కో విభాగానికి 50 మార్కులు చొప్పున మొత్తం 200 మార్కులకు పరీక్ష నిర్వహిస్తారు. పరీక్షకు ఒక గంట సమయం కేటాయించారు.

నెగెటివ్ మార్కింగ్ :

టైర్-1 పరీక్షలో ప్రతి తప్పు సమాధానానికి 0.50 మార్కు చొప్పున నెగెటివ్ మార్కింగ్ ఉంటుంది. అందువల్ల అభ్యర్థులు ప్రశ్నలకు సమాధానాలు గుర్తించే సమయంలో అప్రమత్తంగా వ్యవహరించాలి.

భాషలు, ప్రాథమిక కీ :

ఇంగ్లిష్ కాంప్రహెన్షన్ విభాగాన్ని మినహాయించి మిగిలిన ప్రశ్నపత్రం ఇంగ్లిష్, హిందీ భాషల్లో అందుబాటులో ఉంటుంది. పరీక్షలు పూర్తైన వెంటనే ప్రాథమిక ఆన్సర్ కీని విడుదల చేసేందుకు SSC ఏర్పాట్లు చేస్తున్నట్లు సమాచారం. అభ్యర్థులు పరీక్షకు సంబంధించిన తాజా వివరాల కోసం https://ssc.gov.in/ పరిశీలించాలి.