తెలంగాణ ఆవిర్భావ దినోత్సవం సందర్భంగా వరంగల్ పోలీసులకు రాష్ట్ర పురస్కారాలు:
తెలంగాణ రాష్ట్ర అవతరణ దినోత్సవాన్ని పురస్కరించుకొని విధినిర్వహణలో విశిష్ట సేవలను అందించిన వరంగల్ పోలీస్ కమిషనరేట్ కి చెందిన పలువురు పోలీస్ అధికారులు, సిబ్బందిని రాష్ట్ర ప్రభుత్వం సేవా పతకాలకు ఎంపిక చేసింది. ఈ మేరకు ప్రభుత్వం అధికారిక ఉత్తర్వులు జారీ చేసింది. మొత్తం ముగ్గురు పోలీసు అధికారులకు ఉత్తమ సేవా పతకాలు, 19 మంది పోలీసు అధికారులు మరియు సిబ్బందికి సేవా పతకాలు ప్రకటించడం విశేషం.
ఉత్తమ సేవా పతకాలకు ఎంపికైన వారిలో సీఏఆర్కు చెందిన ఏఆర్ఎస్ఐ ఎం.డి. షర్ఫుద్దీన్, సీఎస్బీ విభాగానికి చెందిన ఏఎస్ఐ పి. వెంకట్ రెడ్డి, ఏఆర్ఎస్ఐ పి. మల్లారెడ్డి ఉన్నారు. వీరు తమ విధుల్లో చూపిన నిబద్ధత, క్రమశిక్షణ, ప్రజా సేవల పట్ల అంకితభావానికి గుర్తింపుగా ఈ గౌరవాన్ని అందుకోనున్నారు.
అదేవిధంగా సేవా పతకాలకు ఎంపికైన వారిలో పర్వతగిరి పోలీస్ స్టేషన్ ఇన్స్పెక్టర్ పి.రాజగోపాల్, ట్రాఫిక్ ఇన్స్పెక్టర్ కె. సుజాత, క్రైమ్స్ ఇన్స్పెక్టర్ ఎ. రాఘవేందర్, పరకాల ఇన్స్పెక్టర్ వి. క్రాంతి కుమార్, రిజర్వ్ ఇన్స్పెక్టర్ పి. స్పార్జన్ రాజ్, ఎస్ఐ పి. శ్రీనివాస్ రాజుతో పాటు వివిధ విభాగాల్లో పనిచేస్తున్న ఏఎస్ఐలు, హెడ్ కానిస్టేబుళ్లు, కానిస్టేబుళ్లు కూడా ఉన్నారు.
సైబర్ క్రైమ్స్, సీసీఎస్, సీఏఆర్, సీఎస్బీ, సీసీఆర్బీ, సీటీసీ, సీపీటీసీ వంటి విభాగాలకు చెందిన సిబ్బంది ఈ జాబితాలో చోటు దక్కించుకున్నారు. ప్రజల భద్రత, శాంతిభద్రతల పరిరక్షణ, నేర నియంత్రణ, దర్యాప్తు మరియు ప్రత్యేక విధుల్లో చూపిన ప్రతిభను పరిగణనలోకి తీసుకుని ఈ అవార్డులను ప్రకటించినట్లు అధికారులు తెలిపారు.
రాష్ట్రస్థాయిలో వరంగల్ కమిషనరేట్ కు చెందిన పెద్ద సంఖ్యలో అధికారులు సిబ్బంది పురస్కారాలకు ఎంపిక కావడం పట్ల పోలీసుశాఖలో ఆనందం వ్యక్తం అవుతుంది. ఈ గుర్తింపు భవిష్యత్తులో మరింత బాధ్యతయుతంగా సేవలు అందించేందుకు ప్రోత్సాహకంగా నిలుస్తుందని ఉన్నతాధికారులు అభిప్రాయపడ్డారు.