విద్యాసంస్థల సమీపంలో పొగాకు విక్రయాలపై కఠిన చర్యలు: వరంగల్ పోలీసుల హెచ్చరిక

వరంగల్ కమిషనరేట్ పరిధిలో విద్యార్థుల ఆరోగ్యం, భవిష్యత్తు రక్షణే లక్ష్యంగా పోలీసులు ప్రత్యేక చర్యలు చేపట్టారు. పాఠశాలలో, కళాశాలల్లో మరియు ఇతర విద్యాసంస్థల పరిసరాలలో గుట్కా సిగరెట్టు తదితర పొగాకు ఉత్పత్తుల విక్రయాలను పూర్తిగా నిరోధించేందుకు “ఆపరేషన్ సేఫ్ స్కూల్” కార్యక్రమాన్ని అమలు చేస్తున్నారు. ఈ సందర్భంగా వరంగల్ పోలీస్ కమిషనర్ “సన్ ప్రీత్ సింగ్” మాట్లాడుతూ..”విద్యార్థులను చెడు అలవాట్ల నుంచి దూరంగా ఉంచడం సమాజంలోని ప్రతి ఒక్కరి బాధ్యత అని అన్నారు. కొత్త విద్యా సంవత్సరం ప్రారంభానికి ముందే విద్యాసంస్థల చుట్టుపక్కల ప్రాంతాలను టొబాకో ఫ్రీ జోన్లుగా మార్చేందుకు ప్రత్యేకతనిఖీలు నిర్వహించనున్నట్లు తెలిపారు”.

పాఠశాలలు, కళాశాలల సమీపంలోని పాన్ షాపులు, కిరాణా దుకాణాలు మరియు ఇతర వ్యాపార కేంద్రాల్లో పోలీసులు విస్తృత తనిఖీలు చేపడుతున్నారు. మైనర్లకు లేదా విద్యార్థులకు పొగాకు ఉత్పత్తుల విక్రయించినట్లు గుర్తిస్తే కఠిన చట్టపరమైన చర్యలు తీసుకుంటామని హెచ్చరించారు.

విద్యాసంస్థల పరిసరాలలో పొగాకు ఉత్పత్తుల విక్రయం నిషేధమని తెలియజేసే అవగాహన గోడ పత్రికను కూడా కమిషనర్ ఆవిష్కరించారు. “సిగరెట్ అండ్ అదర్ టొబాకో ప్రొడక్ట్స్ యాక్ట్-2003” నిబంధనలను ఉల్లంఘించిన వారిపై కేసులు నమోదు చేయడంతో పాటు మైనర్లకు పొగాకు ఉత్పత్తుల విక్రయిస్తే జువెనైల్ జస్టిస్ యాక్ట్-2015 ప్రకారం కూడా చర్యలు తీసుకుంటామని స్పష్టం చేశారు. ఎవరైనా విద్యాసంస్థల సమీపంలో పొగాకు ఉత్పత్తులు విక్రయిస్తున్నట్లు గుర్తిస్తే వెంటనే స్థానిక పోలీసులకు లేదా డయల్ 100 కు సమాచారం అందించాలని కమిషనర్ కోరారు. సమాచారం ఇచ్చిన వారి వివరాలను పూర్తి గోప్యంగా ఉంచుతామని ఆయన చెప్పారు. ఈ కార్యక్రమంలో పలువురు పోలీసు అధికారులు పాల్గొని అవగాహన కార్యక్రమాలను నిర్వహించారు.