హైదరాబాద్: తెలంగాణలో నిరుపేదల సొంతింటి కల నిజం చేసేందుకు ప్రతిష్టాత్మకంగా చేపట్టిన ‘ఇందిరమ్మ ఇళ్ల’ పథకంపై రాష్ట్ర ప్రభుత్వం కీలక అప్‌డేట్ ఇచ్చింది.

జూన్ 2వ తేదీన ఆదిలాబాద్ జిల్లా వేదికగా రెండో విడత ఇందిరమ్మ ఇళ్ల నిర్మాణ కార్యక్రమాన్ని ప్రారంభించనున్నట్లు రాష్ట్ర గృహనిర్మాణ, సమాచార శాఖ మంత్రి పొంగులేటి శ్రీనివాసరెడ్డి ప్రకటించారు.

​శుక్రవారం సచివాలయంలో వరంగల్, ఖమ్మం జిల్లాల హౌసింగ్, రెవెన్యూ అంశాలపై మంత్రులు సీతక్క, కొండా సురేఖ, ప్రజాప్రతినిధులు మరియు ఉన్నతాధికారులతో కలిసి మంత్రి పొంగులేటి ఉన్నత స్థాయి సమీక్షా సమావేశం నిర్వహించారు.

సమీక్షా సమావేశంలో ముఖ్యాంశాలు:

​తొలి విడతలో భాగంగా రాష్ట్రవ్యాప్తంగా 3 లక్షలకు పైగా ఇళ్లను మంజూరు చేయనున్నట్లు మంత్రి వెల్లడించారు.

ఇప్పటికే ప్రతి నియోజకవర్గానికి 3,500 ఇళ్లను కేటాయించామని, ఐటీడీఏ (ITDA) పరిధిలోని గిరిజన ప్రాంతాలకు అదనపు ఇళ్లను మంజూరు చేస్తున్నట్లు తెలిపారు.

​ప్రస్తుతం 2.90 లక్షల ఇళ్ల గ్రౌండింగ్ పూర్తయిందని, మరో 2 లక్షల ఇళ్లు వివిధ నిర్మాణ దశల్లో ఉన్నాయని చెప్పారు.

ఇప్పటికే 50 వేల ఇళ్లకు సంబంధించి లబ్ధిదారులు గృహప్రవేశాలు కూడా పూర్తి చేసుకున్నారని వివరించారు.

​అర్హులైన పేద లబ్ధిదారులందరికీ ఇళ్లు అందే వరకు ఈ పథకాన్ని 3 మరియు 4వ విడతల్లోనూ నిరంతరాయంగా కొనసాగిస్తామని మంత్రి స్పష్టం చేశారు.

గతంలో ఇందిరమ్మ ఇళ్లు రాని పాత లబ్ధిదారులకు కూడా ఈ విడతలో కొత్త ఇళ్లు మంజూరు చేస్తామన్నారు.

అధికారులకు మంత్రి కీలక ఆదేశాలు:

​600 చదరపు అడుగుల విస్తీర్ణంలో నిర్మిస్తున్న ఇళ్ల బిల్లులను ఎలాంటి ఆలస్యం లేకుండా తక్షణమే క్లియర్ చేయాలని అధికారులను ఆదేశించారు.

ఈ ప్రక్రియకు ఫారెస్ట్, సింగరేణి సంస్థలు ఎలాంటి అడ్డంకులు సృష్టించవద్దని సూచించారు.

​గతంలో నిర్మించిన డబుల్ బెడ్‌రూమ్ కాలనీల్లో రోడ్లు, తాగునీరు, విద్యుత్ వంటి మౌలిక వసతులను త్వరితగతిన పూర్తి చేయాలన్నారు.

ఇళ్ల నిర్మాణానికి అవసరమైన ఉచిత ఇసుకను లబ్ధిదారులకు సమీప ప్రాంతాల్లోనే అందుబాటులో ఉంచాలని స్పష్టం చేశారు.

వరంగల్, ఖమ్మంలో భూ వివాదాల పరిష్కారానికి జాయింట్ సర్వే:

​ఖమ్మం, వరంగల్ జిల్లాల్లో దీర్ఘకాలంగా పెండింగ్‌లో ఉన్న భూ వివాదాల పరిష్కారానికి రెవెన్యూ, హౌసింగ్ శాఖల ఆధ్వర్యంలో జాయింట్ సర్వే నిర్వహించనున్నట్లు మంత్రి తెలిపారు.

ఆధునిక సాంకేతికతతో కూడిన ‘రోవర్స్ సర్వే’ ద్వారా భూ సరిహద్దు వివాదాలను పారదర్శకంగా, శాశ్వతంగా పరిష్కరిస్తామని మంత్రి పొంగులేటి శ్రీనివాసరెడ్డి పేర్కొన్నారు.