భానుడి భగభగలతో అల్లాడుతున్న తెలంగాణ ప్రజలకు వాతావరణ శాఖ ఉపశమనం కలిగించే వార్త చెప్పింది. రాబోయే మూడు రోజుల పాటు రాష్ట్రంలోని పలు జిల్లాల్లో అక్కడక్కడ మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది.

రాబోయే 72 గంటల్లో రాష్ట్రవ్యాప్తంగా పలుచోట్ల ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. వర్షాల ప్రభావంతో పగటిపూట ఉష్ణోగ్రతలు క్రమంగా తగ్గనున్నాయి. రాబోయే 5 రోజుల పాటు ఉష్ణోగ్రతలు సుమారు 3 డిగ్రీల మేర తగ్గే అవకాశం ఉందని అధికారులు అంచనా వేస్తున్నారు.

ఇప్పటికే రాష్ట్రంలోని కొన్ని జిల్లాల్లో ఆకాశం మేఘావృతమై ఉండటంతో పాటు పగటి ఉష్ణోగ్రతలు స్వల్పంగా తగ్గుముఖం పట్టాయి. ఈ వర్షాలు వడగళ్ల వానలుగా మారే అవకాశం ఉన్నందున రైతులు, ప్రజలు అప్రమత్తంగా ఉండాలని వాతావరణ శాఖ సూచించింది.