తెలంగాణ రాజకీయాల్లో మరో కీలక పరిణామం చోటుచేసుకుంది. కవిత నేతృత్వంలోని నూతన రాజకీయ పార్టీ ‘తెలంగాణ రక్షణ సేన’ (TRS) కు కేంద్ర ఎన్నికల సంఘం (CEC) అధికారికంగా ఆమోదం తెలిపింది. పార్టీ పేరుపై గత కొద్దిరోజులుగా నెలకొన్న ఉత్కంఠకు తెరదించుతూ, ఈ మేరకు ఈసీ నిర్ణయం తీసుకుంది.

ఇటీవలే కవిత తన పార్టీ పేరును ప్రకటించగా, ‘TRS’ అనే పేరును కేటాయించవద్దని పలువురు ఈసీకి లేఖలు రాసిన సంగతి తెలిసిందే. గతంలో ఉన్న ఒక ప్రముఖ పార్టీ పేరును పోలి ఉందని, ఇది ఓటర్లను అయోమయానికి గురిచేస్తుందని అభ్యంతరాలు వ్యక్తమయ్యాయి. అయితే, ఈ ఫిర్యాదులను పరిశీలించిన కేంద్ర ఎన్నికల సంఘం, చట్టపరమైన నిబంధనల ప్రకారం ‘తెలంగాణ రక్షణ సేన’ పేరుకు అనుమతిని మంజూరు చేసింది.

​ఈ రోజు అధికారులు నేరుగా కవిత నివాసానికి చేరుకుని, పార్టీ రిజిస్ట్రేషన్‌కు సంబంధించిన అధికారిక పత్రాలను అందజేశారు. ఈ ఆమోదంతో ఇకపై అధికారికంగా రాజకీయ కార్యకలాపాలు ప్రారంభించేందుకు మార్గం సుగమమైంది. త్వరలోనే పార్టీ జెండా, ఎజెండాను బహిరంగ సభ ద్వారా వెల్లడించే అవకాశం ఉంది.