పేదల జోలికి రావొద్దు.. అభివృద్ధి పేరుతో అన్యాయం సహించం: వినయ్ భాస్కర్

హనుమకొండ జిల్లా కాజీపేట మండల కేంద్రంలో రైల్వే రిటైర్డ్ ఎంప్లాయిస్ యూనియన్ ఆధ్వర్యంలో శుక్రవారం నిర్వహించిన సమావేశంలో ప్రభుత్వ మాజీ చీఫ్ విప్, మాజీ ఎమ్మెల్యే దాస్యం వినయ్ భాస్కర్ పాల్గొన్నారు. ఈ సందర్భంగా ఆయన మాట్లాడుతూ అభివృద్ధికి తాము ఎప్పుడూ వ్యతిరేకం కాదని, అయితే ఏ వర్గానికీ నష్టం కలగకుండా జరిగే అభివృద్ధినే స్వాగతిస్తామని స్పష్టం చేశారు.

తాను ప్రభుత్వ ఉద్యోగి కుటుంబం నుంచి వచ్చిన వ్యక్తినని, ఉద్యోగులు, పదవీ విరమణ పొందిన ఉద్యోగుల సమస్యలు బాగా తెలుసని పేర్కొన్నారు. రైల్వే రిటైర్డ్ ఎంప్లాయిస్ యూనియన్‌కు కార్యాలయ స్థలం కల్పించేందుకు గతంలో కడియం శ్రీహరితో కలిసి హామీ ఇచ్చామని, ఆ దిశగా తన వంతు కృషి చేశానని తెలిపారు. వివిధ సంఘాలు, అసోసియేషన్లకు కార్యాలయాల ఏర్పాటు కోసం కూడా నిరంతరం పనిచేశానని చెప్పారు.

వైఎస్ఆర్ నగర్ ప్రాంత ప్రజల సమస్యలు తనకు తెలుసని పేర్కొన్న వినయ్ భాస్కర్, పేదలకు న్యాయం జరిగే వరకు వారి పక్షాన నిలబడి పోరాడుతానని హామీ ఇచ్చారు. తన రాజకీయ జీవితంలో ఏ ఒక్క గుడిసెను కూల్చలేదని, పేద ప్రజల జోలికి ఎవరినీ రానివ్వలేదని అన్నారు. భద్రకాళి ఆలయ మాడ వీధుల అభివృద్ధి కోసం గతంలో ప్రత్యేకంగా నిధులు తీసుకువచ్చామని, అయితే చెరబండ రాజు కాలనీ వాసుల ఇళ్లను తొలగించాలని తాను ఎప్పుడూ కోరలేదని స్పష్టం చేశారు.

చిత్తశుద్ధి ఉంటే స్థానిక నిరుపేదలకు సమీప ప్రభుత్వ భూమిలో పక్కా ఇళ్లు నిర్మించి ఇవ్వాలని ప్రభుత్వాన్ని కోరారు. అభివృద్ధి పేరుతో పేదలకు అన్యాయం జరిగితే సహించబోమని, అవసరమైతే న్యాయపరంగా కూడా పోరాటం కొనసాగిస్తామని హెచ్చరించారు.

రాష్ట్ర ప్రభుత్వం ఎన్నికల సమయంలో ఇచ్చిన హామీలను అమలు చేయడంలో విఫలమైందని విమర్శించిన ఆయన, ప్రజా సమస్యలపై ప్రశ్నిస్తున్న వారిపై కేసులు నమోదు చేయడం సరికాదన్నారు. పేదలు, బాధితుల పక్షాన బీఆర్ఎస్ పార్టీ ఎల్లప్పుడూ అండగా ఉంటుందని వినయ్ భాస్కర్ పేర్కొన్నారు.

Read Warangal News and Latest Politics News and Real Estate