వరంగల్ జిల్లాలో దారుణం..వదినపై కక్షతో మరిది ఛండాలమైన పని..:

వరంగల్ జిల్లాలో కుటుంబ విభేదాలు తీవ్ర రూపం దాల్చి దారుణ ఘటనకు దారితీశాయి. వర్ధన్నపేట మండలం ల్యాబర్తి గ్రామంలో మరిది తన వదినపై గొడ్డలితో దాడి చేయడంతో గ్రామంలో ఉద్రిక్త పరిస్థితులు నెలకొన్నాయి. ఈ ఘటన స్థానికంగా కలకలం రేపింది.

స్థానికుల కథనం ప్రకారం, కుటుంబంలో కొంతకాలంగా కొనసాగుతున్న వ్యక్తిగత, ఆస్తి సంబంధిత వివాదాల నేపథ్యంలో ఇద్దరి మధ్య మాటామాటా పెరిగి ఘర్షణకు దారితీసింది. ఈ క్రమంలో ఆగ్రహానికి గురైన మరిది, వదిన కవితపై గొడ్డలితో దాడి చేసినట్లు సమాచారం. దాడిలో ఆమె కి తీవ్ర గాయాలు కావడంతో కుటుంబ సభ్యులు, గ్రామస్తులు వెంటనే స్పందించి ఆమెను సమీప ప్రభుత్వ ఆసుపత్రికి తరలించారు.

అక్కడ వైద్యులు ప్రాథమిక చికిత్స అందించిన అనంతరం గాయాల తీవ్రతను దృష్టిలో ఉంచుకుని మెరుగైన వైద్యం కోసం వరంగల్‌లోని ఎంజీఎం ఆసుపత్రికి రిఫర్ చేశారు. ప్రస్తుతం ఆమెకు వైద్యుల పర్యవేక్షణలో చికిత్స కొనసాగుతున్నట్లు తెలిసింది.ఘటనపై సమాచారం అందుకున్న పోలీసులు వెంటనే గ్రామానికి చేరుకుని వివరాలు సేకరించి కేసు నమోదు చేశారు. పోలీసులు అన్ని కోణాల్లో దర్యాప్తు కొనసాగిస్తున్నారు.