వరంగల్: నగరంలో చైన్ స్నాచర్లు రెచ్చిపోతున్నారు. తాజా ఘటనలతో వరంగల్ ప్రజలు తీవ్ర భయాందోళనలకు గురవుతున్నారు. ఒకే రాత్రి, ఒకే తరహాలో రెండు వేర్వేరు ప్రాంతాల్లో దుండగులు చైన్ స్నాచింగ్లకు పాల్పడటం గమనార్హం.
కాశీబుగ్గలో దారుణం:
సొసైటీ కాలనీ రోడ్ నెంబర్ 3లో నివాసం ఉండే దీప శ్రీ అనే మహిళ, రాత్రి సమయంలో ఇంటి బయట తన పిల్లలకు అన్నం తినిపిస్తోంది. సరిగ్గా అదే సమయంలో పల్సర్ బైక్ పై వచ్చిన ముగ్గురు గుర్తుతెలియని వ్యక్తులు ఒక్కసారిగా ఆమె మెడలోని బంగారు గొలుసును లాక్కొని వేగంగా పారిపోయారు.
క్రిస్టియన్ కాలనీలో మరో దాడి:
ఇదే తరహాలో క్రిస్టియన్ కాలనీలో కూడా దుండగులు పంజా విసిరారు. అడ్వకేట్ మైదం వివేక్ తన ఇంటి ముందు కూర్చొని ఉండగా, అదే పల్సర్ బైక్ పై వచ్చిన ముగ్గురు యువకులు మెడలోని చైన్ లాక్కెళ్లారు.
పోలీసుల అలర్ట్:
వరుసగా జరుగుతున్న ఈ చైన్ స్నాచింగ్లు ఒకే గ్యాంగ్ పనిగా పోలీసులు అనుమానిస్తున్నారు. పల్సర్ బైక్ పై వస్తున్న ఈ ముగ్గురు యువకుల కోసం పోలీసులు గాలింపు చర్యలు చేపట్టారు. నగర ప్రజలు, ముఖ్యంగా మహిళలు రాత్రి సమయాల్లో అప్రమత్తంగా ఉండాలని అధికారులు సూచిస్తున్నారు.