చిల్పూర్ : బాధితులు ఇచ్చే ఫిర్యాదులపై పోలీసులు తక్షణమే స్పందించి వారికి న్యాయం చేయాలని వరంగల్ పోలీస్ కమిషనర్ సన్ప్రీత్ సింగ్ అధికారులను ఆదేశించారు. వార్షిక తనిఖీల్లో భాగంగా గురువారం వెస్ట్ జోన్ పరిధిలోని చిల్పూర్ పోలీస్ స్టేషన్ను ఆయన సందర్శించి, స్టేషన్ పనితీరును క్షుణ్ణంగా తనిఖీ చేశారు.
ముందుగా స్టేషన్కు చేరుకున్న సీపీకి పోలీస్ అధికారులు మొక్కలు అందజేసి సాదర స్వాగతం పలికారు. స్టేషన్ రిసెప్షన్, ఐటీ విభాగం, మరియు ఇతర విభాగాల సిబ్బంది పనితీరును ఆయన అడిగి తెలుసుకున్నారు.
స్టేషన్ నిర్వహణ రికార్డులు, రౌడీ షీటర్లు, అనుమానితుల వివరాలు మరియు పెండింగ్లో ఉన్న కేసుల ఫైళ్లను సీపీ స్వయంగా తనిఖీ చేశారు. స్టేషన్ సిబ్బంది ఎదుర్కొంటున్న సమస్యలను అడిగి తెలుసుకుని, వాటి పరిష్కారానికి సూచనలు చేశారు.
ప్రతి కానిస్టేబుల్ గ్రామాలను సందర్శించి ప్రజలతో మమేకం కావాలని, క్షేత్రస్థాయిలో సమస్యలను తెలుసుకోవాలని సూచించారు.
రోడ్డు ప్రమాదాల నివారణకు ట్రాఫిక్ నిబంధనలపై ప్రజలకు అవగాహన కల్పించాలని, అక్రమ ఇసుక రవాణా మరియు పాఠశాలల పరిసరాల్లో పొగాకు ఉత్పత్తుల విక్రయదారులపై కఠిన చర్యలు తీసుకోవాలని ఆదేశించారు.
ఈ కార్యక్రమంలో వెస్ట్ జోన్ డీసీపీ రాజమహేంద్ర నాయక్, ఏసీపీ భీం శర్మ, సీఐ శ్రీనివాస్ రెడ్డి, ఎస్ఐ నవీన్ కుమార్ తదితరులు పాల్గొన్నారు.
బుగులు వెంకటేశ్వర స్వామి సన్నిధిలో సీపీ
పోలీస్ స్టేషన్ తనిఖీ అనంతరం సీపీ సన్ప్రీత్ సింగ్ చిల్పూర్లోని ప్రసిద్ధ బుగులు వెంకటేశ్వర స్వామి ఆలయాన్ని సందర్శించారు. ఆలయ అర్చకులు సీపీకి ఘన స్వాగతం పలికి, ప్రత్యేక పూజలు నిర్వహించారు. అనంతరం ఆయనకు తీర్థ ప్రసాదాలు, స్వామివారి శేష వస్త్రాలను అందజేశారు. ఆలయ విశిష్టతను మరియు అక్కడ జరిగే ఉత్సవాల వివరాలను అర్చకులు సీపీకి వివరించారు.