వరంగల్: బాధితులు పోలీసుల వద్దకు వస్తే తమకు ఖచ్చితంగా న్యాయం జరుగుతుందనే బలమైన నమ్మకాన్ని ప్రజల్లో పెంపొందించాలని వరంగల్ పోలీస్ కమిషనర్ సన్ప్రీత్ సింగ్ అధికారులను ఆదేశించారు.
శుక్రవారం వరంగల్ పోలీస్ కమిషనరేట్ పరిధిలో ఇన్స్పెక్టర్ల స్థాయి నుండి ఏసీపీ (ACP) లుగా పదోన్నతి పొందిన అధికారులతో ఆయన సమావేశమయ్యారు. పదోన్నతి పొందిన గొర్ల సీతారెడ్డి, బోలగాని శ్రీనివాస్ గౌడ్, సార్ల రాజులు సీపీ క్యాంపు కార్యాలయంలో కమిషనర్ను మర్యాదపూర్వకంగా కలిసి పుష్పగుచ్ఛాలు అందజేశారు. ఈ సందర్భంగా కమిషనర్ అధికారులకు పలు కీలక సూచనలు చేశారు.
పదోన్నతులతో పాటు క్షేత్రస్థాయిలో బాధ్యతలు కూడా పెరుగుతాయని, వాటిని సమర్థవంతంగా నిర్వహించాలని సూచించారు. నిరంతరం క్షేత్రస్థాయి అధికారుల పనితీరును పర్యవేక్షిస్తూ, వారికి సరైన దిశానిర్దేశం చేయాలని ఆదేశించారు.
పోలీస్ శాఖ యొక్క ప్రతిష్టను, గౌరవ మర్యాదలను మరింత పెంపొందించేలా ప్రతి అధికారి తమ విధులను అత్యంత పారదర్శకంగా నిర్వర్తించాలని కోరారు. ప్రజలకు చేరువవుతూ, వారి సమస్యల పరిష్కారానికి మొదటి ప్రాధాన్యత ఇవ్వాలని సిపి స్పష్టం చేశారు.
ఈ కార్యక్రమంలో పదోన్నతి పొందిన అధికారులు సీపీకి కృతజ్ఞతలు తెలియజేస్తూ, అప్పగించిన బాధ్యతలను చిత్తశుద్ధితో నిర్వహిస్తామని హామీ ఇచ్చారు.