వరంగల్లో క్రైమ్ కంట్రోల్కు సీపీ స్పెషల్ ప్లాన్.. హైటెక్ నిఘా..!
వరంగల్ నగరంలో నేరాల నియంత్రణకు పోలీసు శాఖ ప్రత్యేక చర్యలు చేపడుతోందని వరంగల్ పోలీస్ కమిషనర్ సన్ప్రీత్ సింగ్ తెలిపారు. ప్రజలు తమ పరిసరాల్లో గుర్తు తెలియని లేదా అనుమానాస్పద వ్యక్తులు కనిపించిన వెంటనే పోలీసులకు సమాచారం అందించాలని ఆయన సూచించారు.
మంగళవారం కాజీపేట రైల్వే స్టేషన్లో సీసీఎస్ పోలీసుల ఆధ్వర్యంలో నిర్వహిస్తున్న ప్రత్యేక తనిఖీలను సీపీ స్వయంగా పరిశీలించారు. ఈ సందర్భంగా తనిఖీ ప్రక్రియను సమీక్షించి, పోలీసు సిబ్బందికి పలు సూచనలు చేశారు.
సీపీ మాట్లాడుతూ, ఇతర రాష్ట్రాల నుంచి వచ్చే కొందరు నేరస్థులు వరంగల్ నగరాన్ని లక్ష్యంగా చేసుకుని ఇళ్ల చోరీలు, చైన్ స్నాచింగ్లు, ఆస్తి సంబంధిత నేరాలకు పాల్పడుతున్నట్లు దర్యాప్తులో గుర్తించామని తెలిపారు. వరంగల్, కాజీపేట రైల్వే స్టేషన్లు ప్రధాన జంక్షన్లుగా ఉండటంతో నేరస్థులు రైలు మార్గాల ద్వారా నగరానికి చేరుకుని నేరాలకు పాల్పడి తిరిగి వెళ్లిపోతున్నారని చెప్పారు.
ఈ తరహా నేరాలను అరికట్టేందుకు సీసీఎస్ ఆధ్వర్యంలో నాలుగు ప్రత్యేక బృందాలను ఏర్పాటు చేసినట్లు వెల్లడించారు. వీటిలో రెండు బృందాలు వరంగల్ రైల్వే స్టేషన్లో, మరో రెండు బృందాలు కాజీపేట రైల్వే స్టేషన్లో ప్రభుత్వ రైల్వే పోలీసులు (జీఆర్పీ), రైల్వే ప్రొటెక్షన్ ఫోర్స్ (ఆర్పీఎఫ్) సహకారంతో విధులు నిర్వహిస్తున్నాయని తెలిపారు.
దేశంలోని వివిధ ప్రాంతాల నుంచి వచ్చే రైళ్లలో ప్రయాణించే అనుమానితులను గుర్తించి వారి వివరాలను సేకరిస్తున్నామని, ఫొటోలు, వేలిముద్రలు నమోదు చేయడంతో పాటు ఫేస్ రికగ్నిషన్ టెక్నాలజీ ద్వారా పోలీసు డేటాబేస్లతో సరిపోల్చి పరిశీలిస్తున్నామని వివరించారు. గతంలో నేరాలకు పాల్పడిన వ్యక్తుల సమాచారం క్షణాల్లో గుర్తించే సాంకేతిక వ్యవస్థలను వినియోగిస్తున్నట్లు తెలిపారు.
అనుమానితుల వివరాలను రికార్డుల రూపంలో భద్రపరుస్తూ, ప్రత్యేక బృందాలు షిఫ్ట్ల వారీగా నిరంతరం నిఘా కొనసాగిస్తున్నాయని సీపీ పేర్కొన్నారు. ప్రజల సహకారంతో నేరాల నియంత్రణ మరింత సమర్థవంతంగా సాగుతుందని ఆయన ఆశాభావం వ్యక్తం చేశారు.
Read Warangal News and Latest Politics News and Real Estate