వరంగల్: వరంగల్ పోలీస్ కమిషనరేట్ పరిధిలో విధులు నిర్వహిస్తున్న ఇద్దరు సబ్ ఇన్స్పెక్టర్లపై (SIs) క్రమశిక్షణా చర్యలు తీసుకోవడం పోలీస్ శాఖలో చర్చనీయాంశంగా మారింది. విధి నిర్వహణలో నిర్లక్ష్యం, వచ్చిన ఆరోపణలు నిజమని తేలడంతో వరంగల్ పోలీస్ కమిషనర్ సన్ప్రీత్ సింగ్ వారిని సస్పెండ్ చేస్తూ గత రాత్రి ఉత్తర్వులు జారీ చేశారు.
రవి కుమార్ నర్సంపేట పోలీస్ స్టేషన్లో ఎస్సైగా పనిచేస్తున్నారు మరియు ప్రవీణ్ కుమార్ ప్రస్తుతం సి.ఏ.ఆర్ (CAR) విభాగంలో అటాచ్మెంట్లో ఉన్నారు. వీరిద్దరిపై గత కొంతకాలంగా వివిధ అంశాల్లో ఆరోపణలు వచ్చినట్లు సమాచారం.
ఈ ఫిర్యాదులపై ఉన్నతాధికారులతో సీపీ సమగ్ర విచారణ జరిపించారు. విచారణలో వారిపై వచ్చిన ఆరోపణలు ప్రాథమికంగా ధృవీకరించబడటంతో, శాఖాపరమైన క్రమశిక్షణను ఉల్లంఘించినందుకు గాను వారిని సస్పెండ్ చేస్తూ కఠిన నిర్ణయం తీసుకున్నారు.
శాఖలో అవినీతికి లేదా అక్రమాలకు పాల్పడితే ఎంతటి వారైనా సహించేది లేదని, విధి నిర్వహణలో పారదర్శకత ఉండాలని ఈ సందర్భంగా ఉన్నతాధికారులు స్పష్టం చేశారు. ఈ సడన్ సస్పెన్షన్ ఉత్తర్వులతో ఉమ్మడి జిల్లాలోని పోలీస్ వర్గాల్లో ఒక్కసారిగా అలజడి మొదలైంది.