వరంగల్ పోలీస్ కమిషనరేట్ పరిధిలో వరంగల్ డ్రగ్స్ కంట్రోల్ టీమ్ మత్తు పదార్థాల నియంత్రణలో కీలక పాత్ర పోషిస్తోంది. గత రెండు సంవత్సరాలుగా వరంగల్ డ్రగ్స్ కంట్రోల్ టీమ్ మాదకద్రవ్యాల అక్రమ రవాణా, వినియోగంపై ఉక్కుపాదం మోపుతూ అద్భుత ఫలితాలు సాధిస్తోందని పోలీస్ కమిషనర్ సన్ ప్రీత్ సింగ్ తెలిపారు.

గణనీయమైన విజయాలు:

జూలై 15, 2024న ప్రారంభమైన ఈ ప్రత్యేక బృందం, జూన్ 16, 2026 వరకు చేపట్టిన ఆపరేషన్లలో కీలక ప్రగతి సాధించింది:

 192 కేసులు నమోదు కాగా, 403 వ్యక్తులని అరెస్టు చేశారు. 

1,241 కిలోల గంజాయి, 1.5 కిలోల ఓపియం, 22.4 లీటర్ల హషీష్ ఆయిల్, 251 గంజాయి చాక్లెట్లు స్వాధీనం చేసుకున్నారు.

 సుమారు రూ. 8.57 కోట్ల విలువైన మాదకద్రవ్యాలతో పాటు, 601 మొబైల్ ఫోన్లు, 63 ద్విచక్ర వాహనాలు, 8 కార్లు, 6 ఆటోలను కూడా స్వాధీనం చేసుకున్నారు.

నిఘా మరియు అవగాహన:

రైల్వే స్టేషన్లు, బస్ స్టాండ్లు, విద్యాసంస్థల పరిసరాల్లో నార్కోటిక్ డిటెక్షన్ డాగ్స్ సహాయంతో ఆకస్మిక తనిఖీలు నిర్వహిస్తున్నట్లు సీపీ పేర్కొన్నారు.

 అనుమతి లేకుండా మెడికల్ షాపులలో, పాఠశాలల సమీపంలో నిషేధిత పొగాకు ఉత్పత్తులు విక్రయించే దుకాణాలపై కఠిన చర్యలు తీసుకుంటున్నామని వెల్లడించారు.

 ఇప్పటివరకు 435 మందికి కౌన్సెలింగ్ ఇచ్చి, వారిని వ్యసనాల నుంచి బయటపడేలా కృషి చేశామని తెలిపారు.

స్మోకర్లకు ఊరట:

ప్రభుత్వ జి.ఓ. నెం. 4 ప్రకారం, గతంలో గంజాయి వినియోగం (Smoker Case) కేసులు నమోదైన వారు గుర్తింపు పొందిన డీ-అడిక్షన్ సెంటర్లలో చికిత్స పొంది, ఆ సర్టిఫికెట్లను న్యాయస్థానంలో సమర్పిస్తే, వారి కేసులను కొట్టివేసే అవకాశం ఉందని సీపీ గుర్తు చేశారు. ఈ అవకాశాన్ని సద్వినియోగం చేసుకోవాలని ఆయన కోరారు.

సమాచారం అందించండి – వివరాలు గోప్యం:

మాదకద్రవ్యాల రవాణా లేదా విక్రయాలపై సమాచారం ఉన్నవారు 712685299, 8712584473 నంబర్లకు ఫోన్ చేసి తెలియజేయాలని పోలీసులు విజ్ఞప్తి చేశారు.

సమాచారం ఇచ్చిన వారి వివరాలను పూర్తిగా గోప్యంగా ఉంచుతామని హామీ ఇచ్చారు.

సమాజాన్ని మత్తు పదార్థాల రహితంగా మార్చేందుకు ప్రజలందరూ ముందుకు రావాలని పోలీసులు పిలుపునిచ్చారు. ఈ చర్యల ద్వారా వరంగల్ డ్రగ్స్ కంట్రోల్ టీమ్ మరింత కట్టుదిట్టంగా డ్రగ్స్‌పై పోరాటం కొనసాగిస్తోంది.