వరంగల్: గ్రేటర్ వరంగల్ మున్సిపల్ కార్పొరేషన్ (GWMC) పరిధిలో సమగ్ర అండర్‌గ్రౌండ్ డ్రైనేజ్ (UGD) పథకానికి తెలంగాణ ప్రభుత్వం భారీ నిర్ణయం తీసుకుంది. ఈ ప్రాజెక్టు కోసం రూ.5,257.20 కోట్లకు పరిపాలనా అనుమతి మంజూరు చేస్తూ ప్రభుత్వం శనివారం ఉత్తర్వులు జారీ చేసింది.

మున్సిపల్ అడ్మినిస్ట్రేషన్ (UBS) శాఖ జారీ చేసిన G.O.Rt.No.322 ప్రకారం, వరంగల్ ఫేజ్–Iలో సమగ్ర అండర్‌గ్రౌండ్ డ్రైనేజ్ వ్యవస్థ ఏర్పాటుకు ఈ నిధులను వినియోగించనున్నారు. నగరంలో కాలుష్యం తగ్గించడం, మురుగు నీటి పారుదల సమస్యలను శాశ్వతంగా పరిష్కరించడం ఈ ప్రాజెక్టు ప్రధాన లక్ష్యంగా ఉంది.

ఈ ప్రాజెక్టుకు అవసరమైన నిధులను మూడు వనరుల ద్వారా సమకూర్చనున్నారు. ఇందులో

• 50 శాతం బాహ్య ఆర్థిక సహాయం (లోన్)

• 25 శాతం కేంద్ర ప్రభుత్వం నుంచి అర్బన్ చాలెంజ్ ఫండ్ (UCF) కింద

• 25 శాతం రాష్ట్ర ప్రభుత్వ వాటా

ప్రాజెక్టు అమలుకు సంబంధించి జర్మనీకి చెందిన డెవలప్మెంట్ బ్యాంక్ KfW ఆసక్తి చూపినట్లు అధికారులు తెలిపారు. ఇప్పటికే ప్రాజెక్టు డీపీఆర్‌ను పరిశీలించిన KfW బృందం సూత్రప్రాయంగా ఆర్థిక సహాయం అందించేందుకు అంగీకరించినట్లు సమాచారం. తదుపరి చర్యల కోసం ప్రాథమిక ప్రాజెక్ట్ రిపోర్ట్ (PPR)ను అప్‌లోడ్ చేయాలని సూచించింది.

ఈ ఉత్తర్వులు ఫైనాన్స్ శాఖ అనుమతితో జారీ చేసినట్లు ప్రభుత్వం తెలిపింది. ఇకపై ఈ ప్రాజెక్టు అమలుకు అవసరమైన చర్యలు తీసుకోవాలని మున్సిపల్ అడ్మినిస్ట్రేషన్ కమిషనర్‌కు ప్రభుత్వం ఆదేశాలు జారీ చేసింది.

ఈ ప్రాజెక్టు పూర్తయితే వరంగల్ నగరంలో మురుగు నీటి సమస్యకు శాశ్వత పరిష్కారం లభించడంతో పాటు, నగర పరిశుభ్రత మరియు పర్యావరణ పరిస్థితులు మెరుగుపడనున్నాయని అధికారులు పేర్కొన్నారు.