హైదరాబాద్ | తేది: 13-04-2026
మహిళల సాధికారతకు సీఎస్ఆర్ నిధులు పెంచాలి
బంజారాహిల్స్లోని తాజ్ కృష్ణ హోటల్లో నిర్వహించిన మహిళల సాధికారతపై పార్లమెంటరీ స్టాండింగ్ కమిటీ సమావేశంలో వరంగల్ పార్లమెంట్ సభ్యురాలు డా. కడియం కావ్య పాల్గొన్నారు.
ఈ మేరకు సతీష్ ధావన్ స్పేస్ సెంటర్, నేషనల్ రిమోట్ సెన్సింగ్ సెంటర్ ఆధ్వర్యంలో మహిళలపై లైంగిక వేధింపుల నివారణ చర్యలపై నిర్వహించిన కార్యక్రమంలో వరంగల్ ఎంపీ డా. కడియం కావ్య గారు తన ప్రజెంటేషన్ ఇచ్చారు.
ఈ సందర్భంగా వరంగల్ ఎంపీ డా. కడియం కావ్య గారు మాట్లాడుతూ, తెలంగాణ రాష్ట్ర ప్రభుత్వం మహిళల సాధికారతకు అత్యంత ప్రాధాన్యత ఇస్తోందన్నారు. మహిళలను ఆర్థిక, సామాజిక రంగాల్లో బలోపేతం చేయడానికి పలు సంక్షేమ పథకాలు, స్వయం ఉపాధి అవకాశాలు కల్పిస్తున్నట్లు తెలిపారు. మహిళా పారిశ్రామికవేత్తలకు ప్రోత్సాహం, మహిళా సంఘాల బలోపేతం చేస్తుందన్నారు.
పలు పెద్ద పెద్ద సంస్థల్లో కూడా మహిళలపై వేధింపుల నివారణకు కఠిన చర్యలు తీసుకోవాల్సిన అవసరం ఉందన్నారు. అలాగే, మహిళల అభివృద్ధికి కార్పొరేట్ సామాజిక బాధ్యత (సీఎస్ఆర్) నిధులను మరింతగా వినియోగించాల్సిన అవసరం ఉందన్నారు.
ఎన్టీపీసీ, ఆర్ఈసీ, ఎన్బీసీసీ వంటి సంస్థలు అలాగే థర్మల్ పవర్, మినరల్ రంగాలకు చెందిన సంస్థలు తమ సీఎస్ఆర్ కార్యక్రమాల్లో మహిళల సాధికారతకు అధిక ప్రాధాన్యత ఇవ్వాలని సూచించారు.
మహిళల అభివృద్ధికి పెద్ద మొత్తంలో నిధులు కేటాయిస్తే దేశ, రాష్ట్రాల సమగ్ర అభివృద్ధికి దోహదపడుతుందని పేర్కొన్నారు. డా. బి.ఆర్. అంబేద్కర్ గారు చెప్పినట్లు మహిళల అభ్యున్నతితోనే దేశ అభివృద్ధి సాధ్యమని డా. కావ్య పేర్కొన్నారు. మహిళల సాధికారత కోసం మరింతగా నిధులు వినియోగించాల్సిన అవసరం ఉందన్నారు.
తెలంగాణ రాష్ట్రానికి కొన్ని పెద్ద సంస్థలు తగిన సీఎస్ఆర్ నిధులు కేటాయించడం లేదని విమర్శించారు. రానున్న రోజుల్లో ఆయా సంస్థలు రాష్ట్ర ప్రభుత్వానికి మరింతగా నిధులు కేటాయించాలని డిమాండ్ చేశారు.
ఈ సమావేశంలో పలువురు పార్లమెంట్ సభ్యులు, సంబంధిత శాఖల ఉన్నతాధికారులు పాల్గొని మహిళల సాధికారతకు సంబంధించి పలు సూచనలు, అభిప్రాయాలు వెల్లడించారు.