బరువు తగ్గాలని లేదా అదుపులో ఉంచుకోవాలని భావించే చాలామంది కీర దోసకాయను తమ ఆహారంలో చేర్చుకుంటారు. ఇందులో నీటి శాతం ఎక్కువగా ఉండటంతో పాటు పీచు, విటమిన్ కె, విటమిన్ సి, పొటాషియం, మెగ్నీషియం వంటి పోషకాలు లభిస్తాయి. అయితే కేవలం దోసకాయ తినడం వల్లే బరువు తగ్గుతుందని భావించడం సరికాదు. సమతుల్య ఆహారం, శారీరక శ్రమ, తగినంత నిద్ర కూడా బరువు నియంత్రణలో కీలక పాత్ర పోషిస్తాయి.
తక్కువ కేలరీలు.. ఎక్కువ నీరు :
దోసకాయలో కేలరీలు తక్కువగా, నీటి శాతం ఎక్కువగా ఉంటుంది. దీంతో శరీరానికి అవసరమైన ద్రవాలను అందించడంలో ఇది కొంత సహాయపడుతుంది. అలాగే ఇందులోని పీచు కడుపు నిండిన భావన కలిగించడంలో ఉపయోగపడుతుంది. అందువల్ల అధిక కేలరీలు ఉండే స్నాక్స్‌కు బదులుగా దోసకాయను ఎంచుకోవచ్చు.
రోజువారీ ఆహారంలో ఇలా.. :
*ఉదయం అల్పాహారంలో తొక్కతో ఉన్న దోసకాయ ముక్కలను మొలకలు, గింజలు లేదా పండ్లతో కలిపి తీసుకోవచ్చు. మధ్యాహ్న భోజనంలో కూర, పుల్కాతో పాటు దోసకాయ ముక్కలను సలాడ్‌గా తీసుకోవడం సులభమైన మార్గం.
*దోసకాయ, ఉల్లిపాయ, టమాటా, పచ్చిమిర్చి, కొత్తిమీరను తరిగి పెరుగులో కలిపితే రుచికరమైన పెరుగు సలాడ్ లేదా రైటా తయారవుతుంది. సాయంత్రం ఇతర కూరగాయలతో కలిపి దోసకాయ సలాడ్‌గా తీసుకోవచ్చు.
ఒక్క దోసకాయపై ఆధారపడొద్దు :
బరువు తగ్గే క్రమంలో దోసకాయను సహాయక ఆహారంగా మాత్రమే చూడాలి. రోజంతా తీసుకునే మొత్తం కేలరీలు, ప్రోటీన్, పీచు, ఆరోగ్యకరమైన కొవ్వులు, శారీరక శ్రమ వంటి అంశాలపై కూడా దృష్టి పెట్టాలి. ఒకే ఆహారాన్ని ఎక్కువగా తీసుకోవడం కంటే అన్ని పోషకాలు అందేలా సమతుల్యమైన ఆహార విధానాన్ని పాటించడం మంచిది.
గమనిక: ఇది సాధారణ ఆరోగ్య అవగాహన కోసం మాత్రమే. వ్యక్తిగత ఆరోగ్య పరిస్థితులు, వయసు, ఆహారపు అలవాట్లను బట్టి బరువు నియంత్రణ కోసం నిపుణుల సలహా తీసుకోవడం మంచిది.