పిల్లలు, యువతలో డిజిటల్ వ్యసనం పెను ఆరోగ్య సమస్యగా మారిందని, ఇది మానసిక సంక్షోభాలకు, చదువుపై ప్రతికూల ప్రభావానికి దారితీస్తోందని కేంద్ర ప్రభుత్వం తీవ్ర ఆందోళన వ్యక్తం చేసింది.

కేంద్ర ఆర్థిక మంత్రి నిర్మలా సీతారామన్ గురువారం పార్లమెంటులో ప్రవేశపెట్టిన ఆర్థిక సర్వే 2025-26లో ఈ కీలక అంశాలను వెల్లడించారు.

డిజిటల్ పరికరాలకు అతిగా అలవాటు పడటం వల్ల యువతలో ఏకాగ్రత లోపం, పని సామర్థ్యం తగ్గడం, నిద్రలేమి (స్లీప్ డెట్) వంటి సమస్యలు పెరుగుతున్నాయని సర్వే పేర్కొంది.

ముఖ్యంగా 15-24 ఏళ్ల వయస్సు గలవారిలో సోషల్ మీడియా వ్యసనం తీవ్రంగా ఉందని, ఇది ఆందోళన, డిప్రెషన్, ఆత్మన్యూనత భావనలకు కారణమవుతోందని తెలిపింది.

ఆన్‌లైన్ గేమింగ్, ఇతరులతో తమను పోల్చుకోవడం, నిరంతర స్క్రోలింగ్ వంటివి మానసిక ఆరోగ్యంపై తీవ్ర ప్రతికూల ప్రభావం చూపుతున్నాయని వివరించింది.

ఈ సమస్యను అరికట్టేందుకు ప్రభుత్వం ఇప్పటికే పలు చర్యలు చేపట్టిందని సర్వే వెల్లడించింది. మానసిక ఆరోగ్య సహాయం కోసం ‘టెలీ-మానస్’ కార్యక్రమం ద్వారా ఇప్పటివరకు 32 లక్షల కాల్స్ స్వీకరించినట్లు తెలిపింది.

టెక్నాలజీ వ్యసన చికిత్స కోసం బెంగళూరు నిమ్హాన్స్‌లో ‘షట్’ (SHUT) క్లినిక్, ఆన్‌లైన్ గేమింగ్‌ను నియంత్రించేందుకు 2025 చట్టం వంటి చర్యలు అమలులో ఉన్నాయని పేర్కొంది.

డిజిటల్ వినియోగాన్ని పూర్తిగా నియంత్రించడం సాధ్యం కాకపోవడంతో, ప్రత్యామ్నాయ మార్గాలపై దృష్టి సారించాలని సర్వే సూచించింది.

పాఠశాలల్లో ‘డిజిటల్ వెల్‌నెస్’ పాఠ్యాంశం ప్రవేశపెట్టడం, గ్రామీణ-పట్టణ ప్రాంతాల్లో ఆఫ్‌లైన్ యూత్ హబ్స్ ఏర్పాటు చేయడం వంటి చర్యలు అవసరమని తెలిపింది.

యువత భవిష్యత్తును బలోపేతం చేయడానికి శారీరక, మానసిక ఆరోగ్యంపై సమగ్ర దృష్టి అవసరమని స్పష్టం చేసింది.

యువతలో డిజిటల్ వ్యసనం తీవ్ర ఆరోగ్య సమస్యగా మారిందని, ఇది మానసిక సంక్షోభాలు, చదువు-పని సామర్థ్యంపై ప్రతికూల ప్రభావం చూపుతోందని ఆర్థిక సర్వే 2025-26లో కేంద్రం ఆందోళన వ్యక్తం చేసింది. టెలీ-మానస్, డిజిటల్ వెల్‌నెస్ వంటి చర్యలు సూచించింది.