ఆరోగ్యానికి వరం అయిన మామిడి.. ఇలా తింటే శాపం! నిపుణుల హెచ్చరిక :
వేసవికాలంలో ఎక్కువ మంది ఇష్టంగా తినే పండ్లలో మామిడి మొదటి స్థానంలో ఉంటుంది. రుచితో పాటు శరీరానికి అవసరమైన విటమిన్లు, ఆంటీ ఆక్సిడెంట్లను అందించే ఈ పండు ఆరోగ్యానికి ఎంతో మేలు చేస్తుంది. అయితే మామిడిని తినే విధానంలో కొన్ని జాగ్రత్తలు పాటించకపోతే ప్రయోజనాల కంటే ఇబ్బందుల ఎక్కువ అయ్యే అవకాశం ఉంది అని ఆరోగ్య నిపుణులు సూచిస్తున్నారు.
మామిడి పండ్లను ఉదయం అల్పాహారం సమయంలో లేదా భోజనాల మధ్య స్నాక్ గా (లంచ్కు ముందు లేదా తర్వాత 2 గంటల గ్యాప్) తీసుకోవడం ఉత్తమమని చెబుతున్నారు. ఈ సమయంలో తీసుకుంటే శరీరానికి తక్షణ శక్తి లభించడంతోపాటు పోషకాలు కూడా సులభంగా అందుతాయి.
అయితే భోజనం చేసిన వెంటనే మామిడిని డెసర్ట్ గా తినడం మంచిది కాదని నిపుణులు హెచ్చరిస్తున్నారు. దీని వల్ల శరీరంలో క్యాలరీలు, చక్కర స్థాయి పెరిగే అవకాశం ఉంటుంది. అలాగే రాత్రి నిద్రకు ముందు మామిడి తినడం వల్ల అజీర్ణం ,గ్యాస్, కడుపు ఉబ్బరం వంటి సమస్యలు తలెత్తవచ్చు. మార్కెట్ నుంచి తెచ్చిన మామిడి పండ్లను నేరుగా తినకుండా..కొంతసేపు చల్లటి నీటిలో నానబెట్టి.. బాగా శుభ్రం చేసుకొని ఆ తర్వాత తినడం మంచిదని డాక్టర్లు సూచిస్తున్నారు.
మామిడి పండ్లలో ఫైటిక్ యాసిడ్ (Phytic Acid) అనే సహజ రసాయనం ఉంటుంది, ఇది శరీరంలో వేడిని కలిగిస్తుంది. నీటిలో నానబెట్టడం వల్ల ఆ వేడి తగ్గిపోతుంది. తద్వారా ముఖంపై మొటిమలు, వేడి గడ్డలు, మలబద్ధకం వంటి సమస్యలు రావు. పరిమిత మోతాదులో సరైన సమయంలో మామిడి తింటే ఆరోగ్య ప్రయోజనాలను పూర్తిగా పొందవచ్చని వైద్య నిపుణులు చెబుతున్నారు. ఇష్టం అని మామిడికాయలను ఎక్కువగా తినడం వల్ల బాగా వేడి అవుతుంది అని.. చిన్న పిల్లలకి మామిడికాయలు ఎక్కువ పెట్టడం వల్ల విరోచనాలు అయ్యే ఛాన్సెస్ కూడా ఉన్నాయి అని డాక్టర్లు హెచ్చరిస్తున్నారు.