తెలుగు రాష్ట్రాలలో సూర్యుడు తన ప్రతాపం చూపిస్తున్నాడు. రోజురోజుకీ ఉష్ణోగ్రతలు ఎక్కువగా పెరిగిపోతున్నాయి. వడగాలులు ఎక్కువగా ఉంటున్నాయి. దీంతో ఎండ తీవ్రతను తట్టుకోలేక జనాలు ఇబ్బంది పడిపోతున్నారు.
ఎండ తీవ్రత ఎక్కువగా ఉన్నప్పుడు వడదెబ్బ బారిన పడకుండా తగిన జాగ్రత్తలు తీసుకోవాలి అంటూ డాక్టర్లు సలహా ఇస్తున్నారు. మరి ముఖ్యంగా తెలుగు రాష్ట్రాలల్లో 46 డిగ్రీల పైగానే ఉష్ణోగ్రతలు నమోదు అవుతున్నాయి. ఈ క్రమంలోనే చిన్నపిల్లలు, వృద్ధులు, గర్భిణీ స్త్రీలు అవసరం ఉంటే తప్పిస్తే బయటికి రానే రావద్దు అంటూ డాక్టర్ లు సలహా ఇస్తున్నారు. మరి ముఖ్యంగా 12 గంటల నుండి నాలుగు గంటల మధ్య బయటకు అసలు రానే రావద్దు అంటూ హెచ్చరిస్తున్నారు.
వడ దెబ్బ తగలకుండా తీసుకోవాల్సిన జాగ్రత్తలు:
ద్రవ పదార్థాలు : రోజు ఎక్కువగా నీరు, నిమ్మరసం, కొబ్బరి నీళ్ళు, మజ్జిగ, ఓఆర్ఎస్ వంటివి తీసుకోవాలి. ఇది శరీరాన్ని చల్లగా ఉంచి లవణాల సమతుల్యతను కాపాడుతుంది.
దుస్తులు: కాటన్, వదులుగా ఉండే లేత రంగు దుస్తులనే ధరించాలి. ముదురు రంగు బట్టలు వేడిని ఎక్కువగా పీల్చుకుంటుంది.
ఆహారం: మసాలాలు, కారం, నూనె ఎక్కువగా వేసి వేయించిన ఆహారాలకు బదులు తేలికగా ఉండే ఆహారాన్ని తీసుకోవాలి. పుచ్చకాయ, దోసకాయ, ఆరెంజ్ వంటి నీటి శాతం ఎక్కువగా ఉండే పండ్లను తీసుకోవడం ఇంకా మంచిది.
వడదెబ్బ లక్షణాలు & చికిత్స :
*ఒకవేళ ఎవరైనా వడదెబ్బకు గురైతే వారిని వెంటనే చల్లటి ప్రదేశానికి మార్చి తడిగుడ్డతో శరీరాన్ని పూర్తిగా తుడవాలి. అంతే కాదు వాళ్ళకి నీళ్లు, కొబ్బరి నీళ్లు ఇలాంటి ద్రవపదార్థాలను ఇవ్వాలి. పరిస్థితి విషమిస్తే ఆలస్యం చేయకుండా వైద్యులను సంప్రదించాలి.